Si ta na pia di trabou, un trahado lo haya retiro imediato; Parlamentario tambe! 

STA CRUZ -- Lider di MEP Evelyn Wever-Croes den nomber di fraccion di MEP a manda un carta pa Gobernador di Aruba, pa Presidente di Parlamento y pa Minister President di pais Aruba den cual e fraccion di MEP ta condena locual a socede den Parlamento siman pasa entre e presidente di parlamento y e vice presidente di parlamento. Ta un berguensa cu e presidencia di Parlamento ta wordo atendi na e forma aki, esaki ta causa danjo na e imagen di nos Parlamento.

Pesey ta sumamente importante pa un investigacion imparcial wordo hasi y pa Parlamento haya e resultadonan. A rais di e resultadonan Parlamento mester tene esun responsabel y e mester carga e consequencia. No por ta asina cu na pia di trabou cualquier persona lo ricibi su retiro imediato si e lanta man pa otro, anto den Parlamento no? Parlamento mester duna e ehempel y den e caso aki tambe.
Parlamento mester debati tambe con pa evita pa algo asina bolbe sucede den futuro, sea mester cambia e Reglamento di Orden di Parlamento of mester introdusi un Codigo di Conducta. Pero un cos ta sigur, cueste loque cueste nos mester evita pa Parlamento bolbe wordo bergonsa asina.

Ya caba Parlamento a wordo hopi bergonsa caba ora cu e lider di fraccion di AVP sr. Baba Herde ta papia asina tanto palabra malo cu su miembronan di fraccion, hasta cu presidente di parlamento mes. Ora cu Parlamentarionan di AVP ta hasi sonido di porco contra oponente politico pa chercha di su peso. Despues di e dia scur den historia di nos pais di 27 di augustus, e pelea aki siman pasa entre presidente di parlamento y vice presidente di parlamento, ta sigur un otro dia scur.

“Den nomber di fraccion di MEP mi kier reitera cu nos no ta acepta ni tolera forma di trata otro asina. MEP ta condena cu hustamente e sala den cual Parlamento mester sali pa defensa di derechonan humano, en especial derechonan di muchanan, di nos grandinan y di hende muhernan, tabata e scenario pa abuso di hende muher. Mester tuma accion contra esaki” lider di MEP a finalisa y pidiendo Gobernador, Presidente di Parlamento y Minister President un contesta pronto. 

Expresionnan haci den e articulo aki no necesariamente ta refleha opinion di ArenaPoliti.co