ORANJESTAD – Diabierna Minister President Mike Eman a reuni cu Presidente y Vice Presidente di Parlamento, sra. Marisol Lopez-Tromp y sr. Chris Dammers. Enfoque di e encuentro aki ta preocupacion di e lider di AVP y comunidad cu e sucedido den Parlamento entre e dos miembronan di partido. Minister President Mike Eman a sostene e reunion aki den su calidad di lider di partido AVP. E proceso cu a worde inicia cu e dialogo aki ta pa tin un refleccion conhunto riba e sosedido.

Cu esaki ta pone central cu algo asina no mag di ripiti su mes. Cu reconocimiento di gravedad di e sucedido, e dialogo cu a ser inicia por juda conduci na un apertura pa un relacion di trabao positivo basa riba respet mutuo, cu e honor y dignidad di cada un pa nan mes y pa cu nos comunidad. Lider di AVP, Mike Eman, ta expresa cu ambos persona tin un trajectoria respetuoso y un preparacion debido pa por carga nan posicion cu capacidad, honor y dignidad.

Lo tin siguimento riba e reunion aki pa esaki por keda evidente tambe den futuro serando e capitulo aki cu reconocimento necesario di e gravedad di locual a sosode y cu compromiso pasigui pa dilanti na servicio di comunidad den un forma honorabel y cu valornan pa cual esnan envolvi semper a para pe y cu ta forma parti di normanan tambe central pa e organisacion politico cu tanto Presidente di Parlamento Sra. Marisol Lopez-Tromp y Sr. Chris Dammers ta representa.

Expresionnan haci den e articulo aki no necesariamente ta refleha opinion di ArenaPoliti.co