Placa pa bilbioteca ta placa cu mester a bai den caha di gobierno hopi anja pasa, pa drecha biblioteca! 

Cu asombro MEP a tuma nota cu campanja a start pa hasi Otmar Oduber lider di AVP. Y pa stranjo cu ta sona, ta Michelle Hooijboer Winklaar y MIke de Mesa ta esnan cu ta campanjando pa Otmar Oduber. Nos no por cataloga otro e presentacion cu nan a hasi dilanti bilbioteca di San Nicolas. Michelle Hooijboer ta gradisi Otmar Oduber pa pone fondonan disponible, manera cos cu ta di saco di Otmar Oduber nan ta sali. Mike de Mesa ta gradisi Otmar Oduber pa yuda embeyese San Nicolas, pasobra Mike Eman no a logra, manera cos cu ta for di saco di Otmar Oduber e placa ta sali. Boso mester stop di manipula! 

DI UNDA E PLACA TA BIN? 
Ya na anja 2010 Otmar Oduber a crea dos fondo pa desvia placa cu antes tabata drenta caha di gobierno, pa drenta mesora den caha di e minister. Tur e room tax y e casino drop tax cu antes tabata yuda presupuesto di pais Aruba, desde 2010 ta bai straight den caha di Otmar Oduber. Supuestamente Otmar Oduber mester usa e placa ey pa turismo, pero awor a resulta cu ta e placa ey mes mester wordo usa pa financia responsabilidad di gobierno.

Biblioteca na San Nicolas a keda neglisha pa anjas, pasobra Otmar Oduber a bai cu tur e cen. Si Otmar Oduber no a crea su propio fondonan na 2010, lo Biblioteca Nacional a haya atencion hopi tempo pasa pa gobierno. Pero gobierno no tin placa mas, pasobra na forma masha iresponsabel a redusi e BBO desde 2010, y despues pa colmo a permiti Otmar Oduber crea su fondonan y independisa ATA. Mike Eman a permiti Otmar Oduber crese manera un monster, y awor e propio Mike Eman tin problema pa contene e monster ey.

MEP tabata contra e forma con Otmar Oduber kier a independisa ATA, y con Otmar Oduber a crea su fondonan, hustamente pa esaki. Interes general di pueblo a wordo neglisha, pa permiti Otmar Oduber bai cu tur e placa di pueblo. E "regalo" di Sinter-Otmar na Michelle Hooijboer pa e por a drecha e edificio di biblioteca, ta un muesta cu mester cambia e structura mas pronto cu ta posibel. E placa di room tax y di casino drop tax mester bai bek den caha di gobierno, pa asina gobierno por duna poco atencion na infrastructura di nos scolnan, aparte du turismo. Sinter-Otmar a mustra cu e no mester di tur e placa, cu e mes no tin forma pa gasta tur e placa, y awor hasta a cuminsa 'regala' su coleganan placa. Sinter-Otmar ta sinta riba un bulto di placa, mientras minister Angel Bermudez mester ansha tur luna pa sera e buraco financiero. Pero mas tristo ta cu Michelle Hooijboer awor a cuminsa campanja pa Otmar oduber. Dieptriest!

Expresionnan haci den e articulo aki no necesariamente ta refleha opinion di ArenaPoliti.co