Na diferente ocasion nos di partido ABO ta cuestiona e rol di nos parlamentarionan y ta puntra ken su interes realmente ta wordo sirbi. A pesar cu tur miembro a huramenta pa sirbi e interes di pueblo, lamentablemente pueblo ta mira poco di esaki. E organo mas halto den nos sistema democratico, en practica ta nada mas cu un appendix di gobierno. Ta gobierno ta dicidi y ta parlamento ta sucumbi. 

Simannan largo nos tabata urgi parlamento publicamente pa exigi di parti gobierno tur informacion di e negociacion cu CITGO/PDVSA, prome cu gobierno mara pueblo na un acuerdo cu no ta beneficioso pa Aruba. Esaki no tabata hopi pa pidi, teniendo cuenta cu ta gobierno mes a parti e negociacionnan den varios pida. Anto e lo tabata na su luga pa informa y comparti cu parlamento y pueblo tur informacion na final di cada fase kico a wordo palabra y cuanto esaki lo costa pueblo. Esaki no a sosode, pero si riba 13 mei, tur fraccion den parlamento a duna gobierno pabien pa e reapertura sin un dia nan a mira algo of sa precies pakico nan tabata duna gobierno pabien. Pues tur fraccion a duna gobierno un cheque blanco di antemano, pa asina nan tambe por haya un pida di e cabay ‘Troje’ di campaña. A pesar di tur advertencianan logico di partido ABO, parlamento a keda keto y gobierno a bay firma e acuerdo ‘CITGO/PDVSA’ na Venezuela. Dicon esaki no a wordo firma aki na Aruba manera e refineria ta na Aruba? Dicon no por a warda te ora e ‘Refineria Aruba’ a wordo estableci corectamente prome cu a bay firma un acuerdo? Gobierno (minister di Energia) tabatin e aprobacion di parlamento pa lanta ‘Refineria Aruba’, manera ley ta stipula? Tampoco ningun hende sa cuanto e aventura aki lo costa pueblo y si e lo ta den pueblo su beneficio. Awor despues cu tur sorto di acuerdo a wordo firma, pues cu gobierno a mara Aruba pa paga minimal algun miyon dollar na ‘finder’s fee’ y ‘boete clausules’,  diripiente algun parlamentario ta bay exigi di gobierno publicamente transparencia prome cu cualkier contract of garantia pa cuponan di trabou pa hende local wordo firma. Realmente nos honorabel miembronan di parlamento ta kere cu hende lo cay pa nan PR-show di ‘noblesa’ aki? Nan ta laat y awor nan kier haci manera cu nan ta defendiendo pueblo su interes cu algun grito ‘emocional’ den prensa. Increibel!

Dos siman pasa na e reunionnan di IPKO na Hulanda, parlamentarionan a wordo informa cu Aruba tin recursonan mineral. Enbes di a haci e pregunta dicon Hulanda si sa cu tin recursonan mineral, pero e pueblo di Aruba no, atrobe tur parlamentario a keda keto. Tampoco e pregunta a wordo haci kico Hulanda su envolvimento ta den esaki y si e ‘bolo di recursonan mineral’ a wordo reparti caba y entre ken. Mientrastanto tur parlamento ta bek na Aruba y ainda ningun pregunta a wordo haci na gobierno of e minister di Energia riba e asunto aki. Den opinion di partido ABO, e asunto di recursonan mineral ta hopi mas importante cu e reapertura di e refineria. E confirmacion di e existencia di recursonan mineral no solamente lo nifica un solucion pa e debe biyonario cu gobierno mes a causa, pero e tambe lo nifica cu pueblo lo por ta ‘baas in eigen huis’ atrobe, si tin politiconan integro y cu caracter.

Pues tur respet pa e ‘fiesta di e reapertura’, nos ta keda di opinion cu e reapertura di e refineria no ta ‘make good business sense’ y cu tin mas cos menos agradabel scondi tras di e acuerdo ‘CITGO/PDVSA’ cu no ta beneficioso pa Aruba y su futuro generacionnan. Parlamento mester a exigi transparencia for di gobierno prome cu cualkier acuerdo wordo firma y no despues, manera nos a bisa varios biaha publicamente. Gobierno a orkesta e ceramento di e refineria y a haci’e algo emocional cu e por uza despues den campaña, net manera e la haci na 2009 y 2013. Gobierno a viola e ley ‘Settlement Agreement’ durante e negociacion di e acuerdo ‘CITGO/PDVSA’ y parlamento a keda keto. Ta custumber di gobierno pa pasa parlamento tur tipo di ‘fastball’ manera parlamento ta su appendix y tur hende den parlamento ta acepta esaki. Wel e declaracion di e minister di Energia cu e acuerdo ‘CITGO/PDVSA’ lo no sigui si parlamento no duna su aprobacion, ta realmente algo pa pone hende hari y hasta e por wordo considera como un insulta di pueblo su inteligencia. Teniendo cuenta loke a wordo describi, cu nos ta den un aña electoral, tur fraccion a duna gobierno riba 13 mei un pabien caba pa e reapertura pasobra nan tambe kier un pida di e cabay ‘Troje’ di campaña, anto e lo ta dificil pa tuma e declaracion di e minister di Energia na serio. Un otro show parlamentario lo bay wordo organisa pa consumo politico y pa gaña pueblo, pa despues parlamento vota unanimamente pa e acuerdo ‘CITGO/PDVSA’ cu ningun hende sa cuanto e lo costa y cu kisas te aki 3 aña e refineria lo habri. Mientrastanto tur sorto di ‘finders fee’ miyonario lo bay wordo cobra na un grupito selecta, mas stranhero lo haya trabou enbes di hende local y un otro eleccion lo bay wordo gana pa e clase politico tradicional cu t’ey solamente pa sirbi nan propio interes.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co