Awendia e ta conoci cu Venezuela ta pasando den un crisis financiero, economico, social y politico. Tambe ta conoci cu e compania estatal PDVSA (doño di CITGO) por bati bancarota den algun luna, si e no cancela un debe miyonario. Tambe ta conoci cu Venezuela no tin suficiente divisa pa cumpli cu su necesidadnan basico y p’esey un parti di su importacion ta wordo paga cu petroleo. Diferente inversionista y banco mundial, tin miedo pa inverti na Venezuela. Mientras cu varios aerolinea a stop cu nan operacion na e pais, pasobra nan no por saca nan placa for di Venezuela. E descripcion aki, ta señala cu e pais bisiña ta den crisis severo riba tur nivel. Y si bo agrega cu PDVSA ta e fuente mayor di divisa y entrada di e gobierno Venezolano, anto e ta casi imposibel pa bo no haci bo mes e pregunta con realistico of duradero e ‘CITGO/PDVSA-deal’ ta. Tambe e declaracion di e minister di Energia, cu te aki 3 aña e ‘mehorador’ lo ta den operacion ta pone’bo pensa mas y corda riba e manera con e gobierno aki a gana e eleccionnan di 2009 y 2013 cu e tema ‘reapertura di refineria’. Pues vota awor pa un promesa politico di un ‘mehorador’ cu kisas lo duna algun hende local (pero hopi mas stranhero) trabou aki 3 aña.

Riba dje, nos gobernantenan a bay firma e ‘CITGO/PDVSA-deal’ na Venezuela, mientras cu e ‘mehorador’ y e compania cu a wordo lanta lihe pa bay busca placa pa concretisa e acuerdo aki, ta estableci na Aruba. Pues algo hopi straño y cuestionabel. Si ambos entidad ta estableci aki na Aruba, anto dicon e firmamento mester a sosode na Venezuela y no na Aruba? Un gobierno cu ta adicto na show y fiesta ta laga un chens fabuloso asina pasa? Atrobe algo hopi straño y cuestionabel. Por ta esaki mester a sosode na Venezuela pasobra ainda e gobernantenan Venezolano no a lubida e menos bunita palabranan cu  nos minister-president a bisa algun aña pasa di nan difunto presidente Chavez y esaki tabata e forma pa lag’e sa su posicion? Di tur forma e firmamento aki, a pone e mayoria den e parlamento Venezolano rabia masha hopi mes. Pasobra segun nan, esaki ta pertenece na e competencia di e parlamento y ni un dia nan a wordo poni na altura di dje. Pa e mayoria aki, e ‘CITGO/PDVSA-deal’ ta inconstitucional, no transparente y di antemano nan a declara cu nan lo no aproba e acuerdo. Tambe nan a mustra nan sentido nacional ora nan bisa cu si PDVSA ainda tin placa pa inverti, wel e placa ey mester wordo inverti na Venezuela y no na Aruba (Solo, 13 juni 2016). Pues e postura tuma y e declaracion haci pa e mayoria den e parlamento Venezolano, ta solamente aumenta e duda den e factibilidad di e ‘CITGO/PDVSA-deal’ y e sinceridad di nos gobernantenan.

Siman pasa un mayoria den e parlamento Hulandes tambe a cuestiona e ‘CITGO/PDVSA-deal’, su transparencia, e peliger cu e lo por tin pa e situacion financiero debil di Aruba y e consecuencianan cu esaki lo por tin pa e seriedad di e acuerdo ambiental mundial, cu nos minister-president a firma recientemente na Nacionnan Uni (Tweede Kamer, 23 juni 2016).  

Akinan pueblo por mira claramente e diferencia di calidad entre e diferente parlamentonan. Ora e parlamentonan di Venezuela y Hulanda tabata ocupa, profundisa y cuestiona e acuerdo cuestionabel, esun prome yama, nos parlamento, tabata di fiesta cu nan cabay di campaña ‘mehorador’. Dunando ‘pabien’, sunchi y brasa na otro, sin un dia parlamento a wak un documento di e negociacion of di e ‘CITGO/PDVSA-deal’.

E pregunta ta keda dicon parlamento ta tolera y acepta gobierno kibra tur sorto di ley, a pesar cu tur tipo di alarma ta zona cu e ‘CITGO/PDVSA-deal’ no ta na interes of beneficio di e pueblo Arubano? Dicon tur fraccion a core duna gobierno ‘pabien’, mientras cu ainda gobierno no a caba di negocia? Dicon otro parlamentonan si ta cuestiona e ‘CITGO/PDVSA-deal’, mientras esun di Aruba ta prefera di fiesta cu e ‘logro’ di reapertura?

Pues con nos tin cu yama awendia nos parlamentarionan, honorabel miembro, entreguista, probechado of burdugu?


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co