E siman aki Parlamento a trata e Citgo deal pa e reapertura di e refineria por bira un realidad. E reunion importante aki a wordo sigi cu hopi atencion y mester bisa cu hopi reclamo a bin dilanti den Pueblo na e manera cu e reunion a tuma lugar. Na mas di un ocacion tabata dificil pa scucha e Parlamentarionan hiba palabra ya cu e publico presente den e tribuna di Parlamento tabata haci hopi desorden y tabata dificulta e Parlamentarionan, specialmente esnan di opocicion, pa por a hiba nan disertacion den trankilidad. Tur esaki tabata posibel como cu e Presidente di Parlamento nobo a faya di guia un reunion asina importante na un forma debido.

Na nos opinion, un reunion cu un embergadura asina grandi pa nos Pais mester a wordo trata na un manera mas responsabel. No por laga politica partidista domina e ordo cu mester wordo manteni den e reunion. Tur hende mester realisa e importancia di e funcion cu nan tin como Parlamentario di nos Pais y sigur e Presidente di Parlamento mester por compronde su pocicion y actua como tal. Sigur na momento cu mester guia un reunion asina importante cu consecuencianan asina importante pa nos Pais. Un Presidente di Parlamento mester guia un reunion y pone ordo. E no ta wordo nombra den e pocicion importante ey pa saca su gal politico of pa yora un pena. Tur hende mester por sa nan lugar, compronde nan funcion y 'grow up' di cualkier frustracion politico cu nan tin. Ta solamente asina un Parlamentario y sigur uno den e pocicion importante di Presidente di Parlamento por funciona y dirigi reunionnan importante. Sin esaki e Parlamento di Aruba dificilmente por funciona debidamente.

27 september 2016

Expresionnan haci den e articulo aki no necesariamente ta refleha opinion di ArenaPoliti.co