Minister Bermudez riba tratamento di Ley di CITGO. 

ORANJESTAD - Siman a habri cu un tratamento di ley hopi importante pa Aruba, esta e ley pa e reapertura di refineria. Pa Minister di Finanzas, Angel Bermudez e satisfaccion ta grandi despues di a mira e resultado di e negociacionnan di e comision di experto bou liderazgo di Richard Arends.

E mandatario ta relata cu 30 aña pasa ora cu refineria Lago a cera, e mes tabata miembro di e comision encarga cu e negociacionnan cu Lago y tambe e posibel candidatonan pa reactiva e refineria atrobe, pues e historia y proceso aki ta uno cu e mandatario ta hopi familiarisa cun’e.

Segun e mandatario ta conta, e tempo ey no a logra haya un reapertura di e refineria despues cu Lago a cera y consecuentemente Aruba a cay den un abismo, unda cu te hasta e ambtenaarnan a entrega mas cu 25% di nan salario pa aporta na e finanzas di Aruba.

“Ami mes a hiba 3procedura den corte pa loke ta trata fiscalidad pa centenares di miyon, despues di a combati delaster obligacion cu Lago tabata tin cu Aruba. Te hasta e fondo di pension nan a bay cun’e; contrario na loke Shell si a haci pa Curacao”, asina Minister Bermudez a sigui splica.

Pa loke ta trata e negociacionnan actual pa e reapertura di e refinera, e mandatario di finanzas a sigura cu desde un principio a informa e comision di negociacion cu e lo no firma si no tin entrada pa caha di Gobierno aden, como tambe empleo. “Mi no tin placa pa financia y mi NO ta para garantia tampoco!”,asina Minister Bermudez a expresa na e comision.

E mandatario a informa cu Valero a carga su responsabilidad corporativo fiscal, ambiental y tambe ta abandona Aruba lagando atras mas cu 100 miyon florin den bienes efectivo pa cumpli cu su debernan. Ademas a transferi e instalacionan pa pais Aruba na balor di mas di 300 miyon dollar, p’asina Aruba mes tuma den su propio man e distino pa cu su sector petrolero.

“Como un 'deus ex machina' CITGO a drenta y demostra su interes serio pa rehabilita e refineria, generando asina entrada directo y indirecto pa caha di Gobierno. Ademas creando tambe empleo structural pa un gran cantidad di yiu di tera”, asina Minister Bermudez a manifesta durante e prome ronda di contestacion den Parlamento.

Esaki segun e mandatario, lo ofrece nos pais un crecemento economico cu tambe ta beneficia nos finanzas publico structuralmente. Pa Minister Bermudez, esaki no ta un final sino un comienso pa Aruba restructura su sector petrolero pa den futuro esaki cumpli cu tur ley local, internacional y na mes momento forma un pilar importante pa nos economia.

Expresionnan haci den e articulo aki no necesariamente ta refleha opinion di ArenaPoliti.co