Glenbert Croes (MEP): Sala di operacion a wordo laga afor premedita
Nos a tuma nota di e declaracionan hasi relaciona e parti di inclui un sala di operacion den projecto di hospital. Den cuadro di esaki mi kier a resalta e declaracion di e director medico sr. Cilie di hospital kende a declara " cu e no por imagina con ta exclui sala di operacion for di e projecto. Esaki ta comparabel cu si bo lo bai traha un restaurant pero sin un cushina.
For di un comienso nos a senjala cu e proceso di projecto di hospital no a cana bon ora cu por ehempel a scoge e bid mas halto enbes di esun mas abou. Nos ta di pensamento cu e sala di operacion deliberadamente a wordo laga afor pa asina despues por bai negocia "meer werk" asina esaki costa pueblo mas placa. Pa tur claridad ningun momento tawata intencion di gobierno di Aruba pa keda den e margen di presupuesto. Nan ta bisa papel ta pasenshi y hustamente den e documento "beleidsvoornemens" bo por a mira un suma di costo total di 253 miyon florin destina pa e projecto aki. Pueblo mester ta alerta cu awor lo bai bini yen pretexto dilanti pa por bai hustifica cu e suma di projecto tin cu wordo aumenta.
E postura cu a wordo tuma awor unda cu ta e cuidadano lo bai carga cu e peso toch ta uno di condena. Incomprendibel ta cu den henter un projecto nobo di hospital concientemente bo ta laga e sala di operacion afor. Nos mester ta conciente cu ta pueblo y gobierno a pagando e projecto y mester tin transparencia den esaki.
Expresionnan haci den e articulo aki no necesariamente ta refleha opinion di ArenaPoliti.co