Siman pasa IMF a emiti un rapport riba e situacion financiero y economico di Aruba. Manera tawata di spera Gabinete Eman a usa algun alinea di e comunicado di IMF pa asina pronkia y hasi fiesta den media  cu loke ta cumbini nan. Consientemente a opta pa keda tapa e desaster financiero crea den un periodo di 5 aña. Loke cu Gabinete Eman a keda sin menciona di e rapport di IMF ta entre otro cu nos pais ta den un situacion financiero hopi precario, cu e medidanan cu Gabinete Eman a implementa caba (den presupuesto 2014) y e siguiente 24 medidanan cu a wordo poni no lo ta suficiente pa logra un presupuesto balansa na 2018. 

Ta importante pa remarca cu crecemento economico bou Gabinete Eman nunca tawata uno di confia of stabil pa diferente motibo. Es mas si nos tuma 2014 mes como ehempel na un principio ( fin di 2013) a calcula un crecemento di 3.4% cual porcentahe na mitar di aña a wordo baha na 2.7%. despues a resulta cu na fin di 2014 e cifra aki a wordo adapta atrobe na 1.6% dunando e señal real cu e desaroyo economico ta bai di malo pa peor. Nos kier enfatisa riba e hecho cu e crecemento leve di nos economia no ta algo pa gaba cune pasobra e desaroyo financiero mes ta algo pa yora. Bo por traha riba un crecemento economico pero si bo continua cu un mal maneho di finansas publico e resultado na final lo ta nulo. 

Pa loke ta trata e medidanan di acuerdo cu e "Balanced Budget Accoord" IMF a indica den punto 7 di su publicacion, cu esakinan lo NO ta suficiente y cu mester tuma "additional measures" (medidanan adicional) pa por logra un surplus di 0.5% den presupuesto 2018. (CFT tambe a indica esaki). Den e caso aki un biaha mas e parti irrealistico ta wordo treci padilanti pero tambe indicando cu e plan di gobierno riba termino mediano mester tin mas credibilidad. Hecho ta cu si no tin un plan confiabel y bon substancia nos debe nacional lo continua na subi y hustamente aki ta na unda Gabinete Eman I & II ta faya desde comienso di nan gobernacion. 

Enfasis mester wordo poni riba e hecho cu IMF a indica na un manera explicito, cu mas atencion tin cu wordo poni tanto riba medidanan pa baha gasto di gobierno y pa genera entrada. Bo por conclui cu un biaha mas un otro instancia independiente ta cataloga e maneho financiero y plan di Gabinete Eman pa restablece nos finansas como uno incompleto! Nos di oposicion ta lamenta cu Aruba ta na man di Gobernantenan iresponsabel, incapas y cu e enbes di demostra curashi pa enfrenta e realidad di rapportnan di IMF, S&P, Fitch, CFT y CBA , kier sigui biba den e fantasia di "Emanlandia" pa probecho personal y laga pueblo bai paga pa nan mal maneho. Intencionalmente Gabinete Eman I & II a bin ta hibando un maneho financiero y gubernamental hibando nos pais den un abismo sin salida! 

Expresionnan haci den e articulo aki no necesariamente ta refleha opinion di ArenaPoliti.co