Un vision di Gabinete Mike Eman cu ta brinda potencial

ORANJESTAD- Gobierno di Aruba ta masha satisfecho cu e declaracion poni riba papel di IMF, despues cu e instituto di evaluacion aki a keda dos siman na Aruba y a reuni cu masha hopi instancia mes riba nos isla. IMF a sinta tambe cu partidonan di oposicion, cu sin duda a trece nan preocupacion na nan manera dilanti. E rapport di IMF a haya hopi bon comentario di un autoridad grandi riba tereno di economia, e erudita Prof.dr.Vermeend. Un persona intachabel cu no sin mas ta expresa su mes di e forma cu el a haci’e pa loke ta e ponenncianan di IMF. “Rapport IMF is een opsteker voor Aruba”, asina a bisa den un entrevista cu e corant AD.

Prome Minister Eman a splica con un delegacion di IMF tabata na Aruba dos aña pasa caba y pa nan no tabata asina cla ainda cu nan lo duna sosten na e idea cu Aruba por desaroya un pilar economico rond di e diversificacion di e economia den e area di sostenibilidad. E biaha aki IMF a duna full su aporte na esaki. Eman: “Nos ta trahando sumamente duro pa desaroya un niche caminda Aruba ta bira e hub di e establecimento di empresa, consultant y institutonan academico cu ta bay establece nan mes na Aruba pa forma parti di e transicion unico cu Aruba ta haciendo pa na 2020 ta 100% sostenibel.”

Eman a bisa cu tur e tecnologia y maneho cu ta bay wordo aplica pa Aruba por logra como un di e promenan den mundo e meta aki, ta bira tambe fuente di exportacion di conocimento di pais Aruba pa exterior. Un ehempel contundente di esaki ta TNO cu ta estableci na Aruba. Un di e institutonan cu ta forma parti di e transicion local pa bira 100% sostenibel. TNO ta hayando reconocimento den mundo y den nos region caba pa locual Aruba ta haciendo y esaki ta habriendo caminda pa nan den tur e islanan di Caribe y den Sur-America. “Esaki sigur ta un contribucion importante na un pilar economico nobo pa Aruba”.

Eman a subraya cu ta prome bes cu un instituto internacional manera IMF ta duna reconocimento na e escogencia di e base pa un pilar economico nobo. “Algo cu Aruba a scoge p’e y sigur cu esaki pa nos tur y tur nos partnernan internacional – entre otro Carbon War Room, TNO Hulanda y Rocky Mountain Institute - ta un estimulo importante di e escogencia cu nos ta haciendo pa recuperacion economico di pais Aruba y creacion di un pilar nobo.”  IMF ta sigui bisa cu desaroya energia renobabel ta brinda potencial. E vision aki, asina Eman a recorda, a wordo hopi discuti si e tabata realistico, si e ta bay hiba Aruba na un pilar economico nobo. “E no ta algo facil, pasobra si e tabata facil anto e lista di partnenan riba e terneo aki lo tabata mas largo. Nos ta trahando duro a base diario riba e vision aki y poco poco e lista ta bay creciendo y nos ta orguyoso di esaki”.

Expresionnan haci den e articulo aki no necesariamente ta refleha opinion di ArenaPoliti.co