Dialuna mainta Minister di Turismo Otmar Oduber a tene un conferencia di prensa hunto cu representantenan di DOW, Thiel Corperation y Van den Broek pa asina aki papia riba e desaroyonan di embeyesimento di Surfside Beach.

Minister Oduber a splica cu ta trata aki di un proyecto sumamente valioso pa loke ta industria di turismo particularmente. E proyecto na surfside ta bayendo den full swing, y una bes e ta cla e lo yuda cu e problematica cu tin rond di nos beachnan pa loke ta trata e bishitantenan di nos barconan crucero.

Den e cuadro aki Gobierno a inicia un proceso di embeyesimento pa eleva e calidad di nos beachnan. Pa mas di un anja y mey pasa a cuminsa e proceso aki, unda cu fondonan di FTA y TPEF lo cubri e gastonan pa loke ta e trabounan cu ta wordo haci.

Mientras ta trahando pa drecha beachnan, encuentronan pa cu e desaroyo di e ’beach policy’ ta andando, unda lo rerglamenta tanto e sector di hotel y tambe e sector di watersport. Asina aki un ta complementa e otro y ta percura pa crea un plan integral cu lo facilita e problematica cu tin riba nos beachnan na e momentonan aki, e mandatario a bisa.

Surfside Beach ta un di e proyectonan di embeyesimento di nos beachnan, pa cual a cuminsa cu e proyecto na Baby Beach. E proyecto aki na surfside ta un conceccion entre Linear Park I y Linear Park II . Aki ta treciendo mehoracion den henter e area aki, unda antes tabatin un infrastructura perdi, awor lo por conta cu area accesibel, bunita cu facilidadnan di banjo, kiosko y parkeo pa comunidad y e bishitante.

Manera por a compronde di Minister Oduber e proyecto aki den su totalidad tin un costo di 2.1 miyon florin. Aki a inclui un infrastructura cu facilidad di kiosko cu ta parti di e proyecto y lo percura pa brinda loke cu tabata falta na nos beachnan unda e posibilidad di F&B., baño y douche a wordo crea, y si mira banda di esaki lo topa cu henter un infrastructura cu ta brinda facilidad di parkeo y asina aki evita autonan pasa ariba e beach cu tambe ta bay yega na su turno pa wordro drecha.

E embeyesemento aki ta uno importante pa eleva e calidad di loke Aruba ta ofrece. Cu esaki ta ilustra cu fondonan a wordo haci disponibel pa mehora e calidad di producto Aruba.

Ta premira cu e proyecto na surfside beach lo wordo entrega dentro di 2 pa 3 luna, y na mes momento ta andando tambe e proyecto na Arashi , cu ta un inversion di mas o menos 700 mil florin pa crea asina aki facilidadnan cu ta puntonan clabe di e servicio cu nos kier brinda y asina atrae bishitantenan di barconan crucero tambe.

Expresionnan haci den e articulo aki no necesariamente ta refleha opinion di ArenaPoliti.co