ORANJESTAD – Lider di MEP Evelyn Wever-Croes a tuma nota di atakenan baho di presidente di parlamento Marisol Lopez-Tromp den su direccion, y prensa a puntra sra. Wever-Croes pa su reaccion.

“Usualmente ami no ta reacciona riba atakenan infantil di parlamentarionan oponentenan politico. Mi tarea ta controla Gobierno, pa esey pueblo ta pagami, y esey mi ta hasi. Cu presidente di parlamento sra. Lopez-Tromp tin un problema serio cu e nunca por a bira lider di MEP, no ta un secreto. Ta su mesun decision esey tabata y e mes mester biba cu su decision, y si e no por biba cu consequencianan di su propio actonan, e mester busca ayudo profesional.

Awor e ta  presidente di parlamento y e mester percura pa su envidia infantil no stroba funcionamento di Parlamento. Sin embargo nos ta mira cu sra. Lopez-Tromp ta scohe pa perhudica henter un pueblo, djis pa envidia contra MEP.

Fraccion di MEP a pidi 12 reunion di suma importancia desde un anja pasa caba, pero djis pasobra ta MEP a pidi e reunionnan, e no a yama nan. Entre nan MEP a pidi pa debati riba e situacion di hospital, e dump na Santa Cruz, centro di adictonan na Savaneta, problema di asbest na e scolnan na Pos Chikito, cobranza di Serlimar, Valero, fraude di Hard-Rock Hotel, abuso policial den manifestacion dia 1 di oktober, y prijs di coriente. Husga pa bo mes, no tin ningun motibo valido dicon pa un anja largo no a yama e reunionnan aki. Pero en bes di yama e reunionnan aki e presidente di parlamento ta keda pega den pasado, y keda den e mesun yoramento di ken ta atende reunion y ken no. Ami ta representante di pueblo y como tal mi ta atende cu problemanan cu tin den nos comunidad. Mi ta reta sra. Lopez-Tromp pa publica presentie lijsten di reunionnan publico cu ami no tabata presente, pa asina ami publica tur e reunionnan cu e no tabata presente tempo e tabata den fraccion di MEP y tambe como presidente di parlamento.

Mi critica riba e presidente ta pasobra e ta trapa riba reglamento di Orden dia aden y dia afo. Según e Reglamento di orden e mester yama un reunión cu wordo pidi, dentro di 30 dia. Pero e no ta worry cu regla, y riba esey mi ta critic’e. Si e no por cu critica, e mester cuminsa traha drechi.

Mi mensahe na sra. Lopez-Tromp ta:  Aruba ta pasando den temponan hopi dificil, y un actitud infantil asina no ta yuda ningun hende cu nada. Por favor, busca ayudo profesional y stop di culpa MEP pa tur bo fracasonan. Stop di zeur y cuminsa traha. Pueblo merece un Parlamento cu ta funciona mihor, y pueblo merece cu e reunionnan aki ta wordo yama mesora”, tabata mensahe di líder di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co