Desaroyo Politico di 1985 pa 2013 den tres imagen

E siguiente ilustracionnan ta duna un bista di e desaroyo politico di eleccionnan di 1985 te cu 2013. E ilustracionnan ta enfoca mastanto riba partidonan cu ta participa na eleccion 2017. Partidonan cu no ta existi mas of no ta participa na eleccion 2017 ta refleha solamente den e prome ilustracion bou di ‘Tur otro partido hunto’. Un excepcion ta PDR, cu pa motibo di relevancia di desaroyonan politico a wordo inclui den e ilustracionnan.

Den e prome ilustracion por observa e porcentage di votonan obtene pa AVP y MEP. Tambe por wak e porcentage cu AVP y MEP a obtene hunto. E liña blauw ta refleha e porcentage di votonan cu a bay pa tur otro partido hunto. Por nota cu durante e ultimo decadanan un average alrededor di 80% di e votonan valido a bay pa sea AVP of MEP, y alrededor di 20% a bay pa otro partidonan. Na aña 2013 e dos partidonan grandi hunto a ricibi un record di 88% di tur voto valido, mientras cu e otro partidonan a parti 12% di e votonan valido. Por nota cu e record di 88% ta mastanto pa motibo di e crecemento di AVP, considerando cu e mesun aña MEP a cay pa 31% di sosten for di e votonan valido.

Den e siguiente ilustracion por haya un bista mas cla di e resultadonan di e partidonan excluyendo AVP y MEP.

Partido CURPA a participa na eleccion 2009, logrando 0,25% di e votonan valido. CURPA no a participa na eleccion 2013. Pa eleccion 2017 CURPA ta participando atrobe.
UPP a participa pa prome biaha na aña 2013 y a logra 1,4% di e votonan valido. Pa eleccion 2017 UPP a uni cu PPA pa forma e lista combina PPA/UPP. E cantidad di voto acumula di PPA y UPP na 2013 ta 2,3% di e votonan valido.
Kico a cambia pa 2017?
Pa eleccion 2017 hopi por cambia. Of keda mescos. Ex-candidato di AVP Otmar Oduber awo ta lidera e partido nobo POR. Otro partidonan nobo ta RAIZ y MAS. Un desaroyo remarcabel ta cu e ex-lidernan di partidonan CURPA, PPA y RED tur a keda riba lista pero a duna un otro candidato e posicion di lider politico di partido. Ta mustra cu e partidonan cu no a logra asiento na 2009/2013 a wak un necesidad pa haci cosnan diferente, pa asina purba logra un resultado diferente. Esaki tambe ta refleha den e varios intentonan entre partidonan sin representacion den Parlamento pa uni den un of otro forma, pa aumenta nan sosten y chens pa logra un of mas asiento. Di tur e intentonan, PPA y UPP a logra forma un lista combina (PPA/UPP).
Den AVP y MEP tambe tin cambionan pa loke ta trata candidatonan nobo. Manera ta custumber, pronosticonan ta varia substancialmente dependiendo ken bo scucha y cua encuesta bo lesa. ArenaPoliti.co no a haci un encuesta electoral, pero si a haci un encuesta pa midi e preferencia pa sea un gobierno a base di un mayoria absoluto of un coalicion. E resultado ta cu 58% di participantenan ta prefera un coalicion.
Conseho
E conseho di ArenaPoliti.co pa eleccion 2017 ta pa informa bo mes bon y vota a base di loke segun bo pensamento ta e miho opcion pa Aruba como pais y comunidad. Respetando opinion di otro.
Klik aki pa wak tur e listanan pa eleccion 2017, pa lesa e programanan di partido y nan motivacion pakico nan merece bo voto.
Expresionnan haci den e articulo aki no necesariamente ta refleha opinion di ArenaPoliti.co