FRACCION DI AVP SEMPER A TUMA CONSEHONAN NA SERIO Y ACTUA RIBA NAN 

E impresion cu fraccion di AVP den gobierno no lo ta tuma consehonan cu e haya na serio ta totalmente incorecto. Tur lo contrario. Na hopi ocasion ta net e fraccion di AVP cu ta pidi of busca mas informacion y conseho. Por ehempel den e comision di Finansa y Economia cu ta bou di presidencia di Chris Dammers di AVP. For di 2009 gobierno y fraccion di AVP ta ehecutando consehonan cu a ricibi durante di e proceso di formacion di gobierno. Un bon ehempel di esey ta e consehonan pa restructura e fondonan di pensioen cu tabata na caminda pa bancarota. Pa motibo cu si e fondonan di pensioen lo a bay bancarota, mas cu 20 mil pensionado y nan famia lo a keda sin niun entrada, tur instancia y hende a conseha gobierno pa duna prioridad na reorganisacion di e fondonan di pensioen. Den 2010 caba y den añanan despues, gobierno di AVP a presenta na parlamento leynan cu a haci cambionan chikito pero importante den e sistema di pensioen di Aruba. E individualisacion di prima y e aumento di e entrada cu ta contribui na prima di pensioen di behez iden prome aña. Tur esaki a sosode a base di consehonan cu gobierno y parlamento a haya. Na 2013 Gobernador a conseha e formador pa caba di reorganisa e fondo di pensioen di trahadornan di gobierno y maestronan di scol. Na fin di 2014 CFT a conseha esaki tambe. Prome cu esey IMF, raad van Advies y otro instancianan a bisa cu e fondo di pensioen di e mas cu 3000 pensionado di gobierno y enseñansa ta un riesgo pa finansa publico y pesey mester drech'e. Pa e un suma total di 170 miyon florin, a caba di drecha e fondo di APFA na 2014. Tambe a base di consehonan ricibi.

2015
Pa e presupuesto di 2015 tur conseho di IMF, Raad van Advies, CFT y hasta instancianan manera Standard & Poors y Fitch a bisa cu gobierno tin un plan "ambicioso" di reforma di entrada y gastonan. Pero tog nan tur a conseha pa aumenta e entradanan di gobierno. CFT a propone pa introduci e "solidariteitsbelasting" cu lo mester a bira un BBO adicional di por lo menos 5 porciento. Oposicion a hasta bisa cu e mester bira 15%. Gobierno di AVP a bisa cu embez di introduci belasting nobo y un peso demasiado grandi riba pueblo y economia, ta bay cobra belasting cu ainda hende y companianan debe. Di e forma aki tambe gobierno ta haya placa cu e no ta hayando awor aki. Siman pasa e fraccion di AVP a bay un tiki mas leu den direccion di e consehonan cu nan a haya y a aumenta e BAZV cu 1%. E placa di BAZV ta bay completamente pa cubri seguro medico, cu awor ainda ta depende hopi di gobierno. Pero pa mantene forsa di compra di pueblo, fraccion di AVP a baha e prima cu trahadornan ta paga na AZV cu 1%.
Rene Herde': "Kiermen cu e consehonan di IMF, Raad van Advies, CFT, S&P y Fitch, tur ta wordo bon ricibi door di gobierno y fraccion di AVP. Pero na final kico nos ta haci pa logra e mes un meta di e consehonan cu nos haya, ta depende di un condicion: si loke nan conseha ta na interes di nos pais. Si nan ta yuda crecemento economico, si nan ta yuda comercio crece y crea trabou, si nan ta yuda mantene forsa di compra. Si nan ta yuda balansa presupuesto. Nos ta pone tur esey den balansa y tuma nos desicionnan. Semper na interes di pueblo."

Expresionnan haci den e articulo aki no necesariamente ta refleha opinion di ArenaPoliti.co