MEP ta construi, AVP ta destrui! 

No ta pasa un dia cu e gobierno actual ta papia solamente di energia alternativo, sostenibilidad, eficiencia etc, haciendo como sifuera cu tur e aspectonan aki di medio ambiente a inicia desde cu nan a drenta gobierno na final di 2009. Den e reunion di Parlamento siman pasa, Minister Mike de Meza - tumando tur honor pa su mes - a declara entre otro “cu pa medio di remplasa e metodo pa converti awa di lama den awa potable y introduci Sea Water Reverse Osmosis a subi e rendimento y a mehora e eficiencia entre 400 pa 600%. Esaki a resulta den un rebaho di 30% den e prijs cu ta cobra e cliente residencial pa awa”. Mas aleu e minister a declara cu “a cambia e sistema di boiler-turbina pa motornan RECIP, cu ta 50 pa 70% mas eficiente. Esaki a keda refleha den un 15 pa 16% di descuento pa clientenan residencial”.

Prijs di awa y coriente
Treciendo tur esakinan padilanti Minister de Meza a haci como sifuera cu tur e proyectonan relaciona cu Sea Water Reverse Osmosis y tambe di RECIP tabata basa riba su vision y cu esakinan a ser ehecuta durante cu e ta minister. Sinembargo tur hende na e momento aki ta na altura caba cu e proyectonan aki a ser plania, inicia y ehecuta durante Gabinete Oduber IV. Esaki a wordo confirma tambe door di director di WEB kende na juli 2012 a declara cu tur e inversionnan aki a inicia for di 2007 en adelante y cu porfin pueblo lo por bay disfruta di un rebaho substancial di e prijsnan di awa y coriente.

Aumento di coriente cu 11.7%
Sinembargo locual ta mas lamentabel ainda ta cu Minister de Meza kier manipula mente di pueblo bisando cu e prijs di coriente a baha cu 15 pa 16% pa clientenan residencial. E ponencia aki lo por tabata realistico si e gobierno di AVP no a hedge e prijs di crudo pa casi 100% y durante un periodo di 2 aña. Esaki tabata un decision insolito y iresponsabel, ya cu esaki a conduci cu e prijs di coriente a conoce un aumento di 11.7% desde oktober 2014. Te ainda pueblo no ta disfrutando y lo no disfruta por lo pronto di un prijs di coriente reduci debi na e decision descabeya aki di e gobernantenan actual. Pues aki por mira un biaha mas cu tur locual MEP a construi cu e proyectonan menciona a wordo destrui den un periodo masha cortico door di Gabinete Eman y AVP.

Expresionnan haci den e articulo aki no necesariamente ta refleha opinion di ArenaPoliti.co