CHRIS DAMMERS TA NENGA OPOSICION TEMPO PA STUDIA LEY

ORANJESTAD -- Parlamento ultimo simannan a mustra un cambio pa loke ta respet na derechonan democratico, desde cu Marisol Lopez-Tromp a brinda oposicion hasi nan trabou manera mester ta. Sinembargo sra. Lopez-Tromp ta den exterior y Chris Dammers a demostra cu e ta caba cu esey mesora, y a introdusi dictadura bek den Parlamento.

Fraccion di MEP a denuncia esaki tambe na Gobernador y na Politiek Den Haag, na momento cu e presidente di Parlamento a duna nan apenas 24 ora pa studia e ley di aumento di BBO y prepara preguntanan. MEP a protesta fuertemente durante e reunion di comision central den cual Chris Dammers kier a forsa esaki.

Ta increible cu MEP mester a mendiga pa mas di mey ora djis pa haya mas tempo pa prepara. AVP no mester di tempo pasobra segun nan, nan a trate extensamente caba durante reunion publico di presupuesto. Esaki NO ta berdad, pasobra e nota di cambio cu e aumento di BBO a wordo entrega apenas un rato prome cu votacion di presupuesto. Ademas, si ta asina mes, no ta motibo pa stroba oposicion di hasi su trabou debidamente.
E aumento di BBO ta un ley cu un embargadura grandi. Especialmente mirando cu AVP ta e partido cu a priminti di elimina e BBO, y awor ta hise mas halto ainda. Awor cu oposicion kier prepara su mes bon riba dje, anto mester roga pa por prepara?
Awor ta net un anja pasa cu Parlamento a vota riba e presupuesto 2014, e berguensa mas grandi cu e Parlamento aki a pasa. Nos tur sa kiko a pasa despues: Gobernador no a firma e ley y Mike Eman a bai den welga di hamber. Parlamento a pasa berguensa, pasobra esnan cu a kere den e gobierno a wordo tuma hasi. Pero nos cu NO a kere den e gobierno tambe a wordo bergonsa.
Si e parlamento aki kier respeta su mes, ban cuminsa aki. Duna parlamentarionan tempo pa nan por prepara. E ley aki tin un embargadura hopi grandi. Loke nos ta pidi no ta ireasonable, e ta necesario.
Nos tur ta di acuerdo cu aki ta trata un medida cruel contra pueblo, pues parlamentaruionan cu ta representante di pueblo tin e derecho, hasta e deber moral, pa prepara nan mes debidamente. Dicon Chris Dammers ta kita e derecho aki di parlamentarionan?

Expresionnan haci den e articulo aki no necesariamente ta refleha opinion di ArenaPoliti.co