Esaki a bin dilanti durante reunion di Minister Oduber cu Sheepvaartsbeveiligingscommissie 

Siman pasa Minister Otmar Oduber tabatin e reunion bianual cu e Scheepvaartbeveiliginscommissie durante cual a papia riba diferente tema di interes manera ta e evento di Sail cu a tuma lugar na mei, bishita di Guarda Costa Mericano y tambe riba Barcadera.
E scheepvaartbeveiliginscommissie ta un comision cu pa ley tin e tarea di duna conseho riba toma di pasonan pa mehora e seguridad maritimo teniendo na cuenta e tratadonan y acuerdonan internacional vigente di cual reino Hulandes ta forma parti. E comision ta institui a traves di e Scheep- en luchtvaartbeveiligingsverordening y nan ta reuni un biaha pa luna y Minister Oduber ta presidi e reunion un biaha cada 6 luna.
E puntonan cu a trata durante e reunion di siman pasa tabata Sail 2015 riba cual a bisa cu e tabata bon organiza y solamente algun detaye chikito tabata falta.
Riba e bishita di Guarda Costa Mericano a bia cu nan a bishita nos isla na cuminsamento di juni. Ta trata di un bishita anual pa haci inspeccion. E resultado di e inspeccion aki ta cu Aruba ta cupli cu e ISPS-code y ta e miho entre e islanan den Caribe pa loke ta e cumplimento di e ISPS-code aki. (ISPS code, International Ship and Port Security Code, ta un codigo internacional pa seguridad di barconan y facilidadnan di waf. Esaki ta parti di eTratado Internacional relaciona cu seguridad di personanan riba lama).
Tambe Guarda Costa Mericano a duna palabra di elogio relaciona cu Barcadera, pasobra a pesar cu tin un construccion asina grandi tumando lugar, toch ta cumpliendo cu ISPS.
Den cuadro di Barcadera Minister Oduber a pidi pa IBSL, cu tin e rol di realiza e control di mantene e reglanan den e facilidadnan di waf conforme tratadonan maritimo y aereo den cuadro di seguridad di e facilidadnan di waf, pa entrega un rapport den cual ta duna informacion riba e dos wafnan (APA y Barcadera). Tambe e mandatario a pidi pa e departamentonan envolvi describi nan tareanan y traha un procedimiento den su totalidad di Barcadera. Esaki pa tin claridad riba kico cada tarea di cada departamento ta y asina den caso di incumplimento, e persona of personanan por wordo atendi directamente cune. E mandatario a duna un periodo di 3 luna pa finaliza esaki.
Intencion ta pa e trabounan na Barcadera funciona na e miho forma posibel unda cada departamento sa kico nan tarea ta y logra e miho rendimento posibel.
Minister Otmar Oduber a indica cu e reunionnan aki riba seguridad maritimo ta hopi importante pa mantene nos isla na e nivelnan di seguridad mas halto riba nivel internacional.

Expresionnan haci den e articulo aki no necesariamente ta refleha opinion di ArenaPoliti.co