ORANJESTAD – Esaki ta loke cu Prome Minister Mike Eman a trece dilanti den e conferencia di prensa semanal di Gabinete Mike Eman II di tur dialuna.

Ta trata die caso di e Arubiano Mitch Henriquez, kende tabata ta un concierto den Zuiderpark, Den Haag, ora cu un intervencion di Polis el a perde su bida, di un manera cua wordo cuestiona pa gran mayoria di esnan cu ta sigui e caso di cerca. Despues di e suscedido lamentabel y e imagennan a sigui como muestra di loke a bay robes, a pone Rijksrecherche pa sigui cu investigacion di e caso, segun Ministerio Publico di Hulanda a informa den curso di ayera.

“Un Arubiano, un conciudadano di nos pais, sr. Michael Henriquez, Mitch cu ta su nomber di cariño, a fayece den un incidente hopi penoso durante di un festival na Hulanda, caminda miembronan di Cuerpo Policial di Hulanda tambe tabata envolvi,” e mandatario a bisa na inicio di e conferencia.

Prome Minister di Aruba, despues cu e caso aki a bira conoci, a tuma contacto cu Minister Plenipotenciario  di Aruba na Hulanda Alfonso Boekhoudt, cu e peticion pa guia famia y amistadnan di Mitch na Hulanda. Tambe na Aruba, Prome Minister Eman tabatin contacto telefonico cu ruman di Sr. Henriquez pa expresa e dolor pa cu e sucedido y pa informa nan cu Gobierno di Aruba ta sigui e caso di cerca y ta den contacto estrecho cu autoridadnan di Hulanda.

Loke cu a sosode cu e Arubiano Mitch Henriquez, kende tabata cu vakantie na Hulanda, y mas ainda loke cu a mira riba videonan graba, ta pone cu tur hende ta exigiendo un investigacion. “E imagennan cu nos tur por a mira y ta lanta cierto inkietud cerca nos tur cu preguntanan tambe riba con algo asina por a desaroya te na yega na morto tragico di Mitch Henriquez,” Eman a bisa den e conferencia di prensa.

Tambe Prome Minister Eman a informa cu e tabatin contacto cu Minister Plasterk, unda cu e mandatario Hulandes a extende palabranan di condolencia pa famia di e fayecido na Aruba. Y durante e combersacion aki, segun Eman a informa, su colega Hulandes a sigur’e cu e trabounan necesario ta wordo haci pa saca afo kico a pasa cu a causa cu un persona di Aruba a perde su bida. “Cu Minister Plasterk mi tabatin un combersacion awe mainta  y el a cuminsa pa extende su condolencia na famia na Aruba pa locual a sosode. El a sigurami cu di parti di Minister di Husticia y di parti di e sistema hudicial di Hulanda ta haciendo tur cos pa e caso haya e aclaracion cu e mester haya tambe pa por sa kico a sosode realmente y pa e conclusionnan por wordo saca.” Y a agrega cu “nos lo keda den contacto cu Minister Plasterk cada momento pa ta na altura di kico a sosode exactamente segun e investigacion duna mas informacion y Arubahuis a pone di su parti, tanto pa e aspecto di con ta cana den e procedura aki pa haya sa exactamente kico a sosode y banda di esey duna tur asistencia cu ta necesario na tanto famia como amistadnan di sr. Henriquez p’asina por yuda nan carga cu e peso di dolor di un caso asina sin sentido y asina inespera.”

Expresionnan haci den e articulo aki no necesariamente ta refleha opinion di ArenaPoliti.co