Diabierna 18 di september 2015 ta un otro dia cu lo bay den historia como e dia cu e minister encarga cu salubridad atrobe a wordo humiya door di su propio partido.
Mi a tuma mi tempo pa acudi na e “cas di pueblo”, cu ta Parlamento, pa por a presencia e debate encuanto e otorgamento corupto di e proyecto di hospital na e amigo Arellano di e mafioso Bermello. Un otorgamento cu a tuma lugar door di Frensel Giel di AIB, John Hodgson di SOGA, y e miembronan di e Infra-team cu ta representa gobierno, encabesa pa Mike E. y yuda pa entre otro R. Visser y Benny S.
E reunion lo mester tabata un continuacion di un encuentro cu a tuma lugar na februari 2015 y na unda e Minister di Salubridad a wordo humiya pa di prome bes door di su propio partido, pasobra e minister su disertacion encuanto e cambernan di operacion di hospital no tabata tin ni pia ni cabes.
E minister a priminti na februari u.p. di lo bolbe parlamento cu un investigacion despues di 2 siman, y kiko e realidad a resulta: parlamento mester a warda 6 luna pa scucha un minister decepciona hasta su propio partido cu a humiyé pa di dos biaha, y obligue manera un “mucha manda” pa bay haci su huiswerk di nobo atrobe. Un berguensa total pa un minister fracasa.
E minister a trata di bisti su “bachi di homber” prome cu e encuentro den parlamento a tuma lugar, haciendo declaracionnan y acusacionnan pisa na medionan di comunicacion, y dicidido pa actua contra esnan cu a comete fayonan na hospital, pero den parlamento mes ela presenta bistí den su “carson cortico” di e mucha di skol cu declaracionnan cu tabata carece di tur seriedad, y na unda e mes publicamente ta laga sa cu e Raad van Toezicht y Raad van Bestuur a falté respet pa 6 luna largo.
P’esey no ta nada straño cu su mes un partido a traté manera cu e mes a bin ta profila su mes, esta, como un mucha "rabo sushi"! Un berguensa total pa un minister fracasa.

Mi ta convenci cu tur e “bada bada” cu a tuma lugar den Parlamento y tur e supuesto tardansa den tratamento di e proyecto corupto di hospital, a tuma lugar cu un solo proposito.
Mi ta convenci cu deliberadamente e gobierno di Mike E. a hiba Schwengle pa altar di sacrificio pa asina por desvia atencion di e proyecto corupto di hospital, y tambe gana tempo. Mas tardansa tin pa un investigacion imparcial y profesional tuma lugar entorno e hospital, mas chens Mike E. tin pa tapa tur e posibel pruebanan cu lo por incrimina su persona, su gobierno y su compinchinan.
Ta hopi remarkabel tambe cu e 1/2 minister aki tabata su so den e reunion aki; unda su "handlanger" Benny S. a keda e biaha aki?
P’esey e supuesto investigacion di e hechonan (feitenonderzoek) cu Raad van Toezicht (mayoria ta campañadornan di AVP) lo mester bay ehecuta, ta un hilaridad, y tin unicamente como meta mas tardansa pa evita cu un investigacion drechi lo por tuma lugar. Un berguensa total y un otro maniobra di un gobierno fracasa cu ta sigui manipula y ta sigui suta pueblo cu medidanan.

Ta p'esey UPP ta para ariba cu si mester bin un investigacion, sea "feitenonderzoek" of un "forensisch onderzoek", esaki MESTER sosode door di un compania IMPARCIAL, y no door di un set di hende, cu aparte di ta muchanan manda di Mike E. y Schwengle, ta complice tambe den henter e asunto aki, door cu nan tambe a mira e documentonan, y si ta hende drechi nan ta, mester a bay Ministerio Publico caba, bay duna keho di e tantisimo corupcion cu a, y ta tumando lugar den e proyecto aki.

Den e reunion di diabierna ultimo, e minister "rabo sushi" a declara cu TUR ciudadano cu ta desea esey, por acudi na SOGA (sr. Hodgson cu tabata presente den e reunion, a duna señal di ta di acuerdo) cu lo facilita e documentonan entorno e proyecto en cuestion.
Mi ta spera cu TUR documento lo ta na disposicion di pueblo pa inspeccion, tambe esnan cu tin di haber cu e votacion cu a tuma lugar, na unda a escohe e contratista cu a demanda un prijs mas halto.
UPP lo exigi tambe pa AIB habri nan bukinan, pasobra lo ta interesante pa investiga si ta tur miembro di AIB tabata tin e mesun opinion durante otorgamento di e trabou na Arellano.

Por medio di esaki, UPP ta anuncia cu nos lo bay dirigi un carta na SOGA pa nos por bay pasa den e documentonan, obviamente cu expertonan riba e tereno investigativo.
Ta di spera cu en berdad nos haya TUR documento pa mira riba HENTER e procedura cu a conduci na otorgamento di e proyecto na e gruponan mafioso di Miami.
Ta di spera cu ni e minister ni SOGA bay "chicken-out" awor!


Den nomber di Union Patriotico Progresista – U.P.P.
Candelario A. S. D. Wever
Brazil, september 20, 2015

Expresionnan haci den e articulo aki no necesariamente ta refleha opinion di ArenaPoliti.co