Siman pasa mi a priminti nos pueblo y minister Schwengle cu mi lo reacciona riba su ponencionan publica den cierto medionan di comunicacion tocante renobacion di e salanan di operacion di hospital. Mi lo inclui e reaccion di sr. Frensel Giel publica dia 17 di februari 2015.

Remarcabel den dicho declaracion ta cu sr. Giel a recore e caminda di gaña, loke ta di lamenta. Y alabes e ta  defende e gobierno, AIB y SOGA ferozmente. Dicon e no a defende e proyecto di Dump? Dicon e no a defende su mesun raport di 2007 riba e construccion di un hospital nobis nobis, na un prijs mucho mas abow cu e renobacion aki?? Cos di sconde e tin? Of ta placa ta lora?

E prome mentira cu tanto minister Schwengle como sr.Giel a trece padilanti, ta ora ambos a duna di conoce cu nan no tabata na altura di un otro “oferta” haci door di un compania hulandes (Bussman). Ta kiko un delegacion di Aruba a bay haci Miami anto na mei 2014?
Segun e informacionnan cu mi a haya den mi brievenbus, sr. Giel tambe a forma parti di dicho delegacion. Hopi peculiar den esaki ta cu ta net 9 luna despues Bermello ta presenta su plan. Den e delegacion aki tambe tabata tin representante di HOH.

Un otro prueba cu sr. Giel ta gaña, ta e hecho cu den e plan di Bermello ta haci mencion cu " BUSSMANN SOLUTION  NOT  TO  BE  CONSIDERED  AS  PER  SOGA"!! Sr. Giel no ta forma parti di SOGA? Dicon mester gaña cu e no ta na altura di otro oferta??

Tambe e ta señala cu no tin tempo mas pa tene un destaho publico, pasobra e decision mester wordo tuma di inmediato. Dicon a tarda asina tanto pa tuma un decision, si for di mas di un aña y mei pasa e Raad van Bestuur a alerta AIB, SOGA y infrateam cu e salanan di operacion NO tabata cuadra cu e exigencia di calidad hulandes. Aki ta na unda e discusion a start.
En berdad ta e Raad van Bestuur anterior a indica na ministernan di gabinete Mike Eman I cu renobacion di e salanan di operacion no tabata necesario, pasobra ya caba un adaptacion di e salanan di operacion a caba di tuma lugar, hunto cu e renobacion di ICU/MCU y dialyse, cu a costa hospital 10 miyon florin. E suma aki hospital mester a presta, apesar di un situacion financiero malo.
Hospital cu lomba contra muraya e dicidi di haci e prestamo pa por cumpli cu e exigencianan menciona.
Tambe e keda palabra cu gabinete Mike Eman I cu hospital lo a haña e 10 miyon florin back ora cu e traspaso di e tereno keda formalisa cu SOGA.
E suma aki a wordo traspasa ??? Segun mi informe esaki tampoco a tuma lugar. E 40 miyon cu SOGA a paga, a bay full na pago di klinkers, Green Conferences, coordinadornan, etc. etc.
Pues esaki ta un otro mentira di tanto sr. Schwengle como Giel.

Awor, bien purba di hustifica e hecho cu atrobe ta privilegia e compania cu e imagen dudoso for Miami. Pa keda den terminologia medico, awor cu tempo ta preta, ta bin bisa cu mester di haci un "keizersnede", sino e baby di Bermello lo por nace morto.

Pues tabata tin tur tempo pa dedica na un destaho publico, pasobra na mei 2014 e compania Bussman a tene un presentacion na Miami pa Bermello, AIB, SOGA, infrateam y representantenan di hospital. A discuti posibel scenarionan pa renobacion di salanan di operacion.
Nos a bin compronde cu Bussman a presenta 7 scenario, di locual e sumanan menciona no tabata surpasa 10 miyon dollar. Es mas, e tempo ey a sali for di un koers di euro pa dollar di 1.35. Awendia euro a baha y esey por nifica un reduccion aun mas di e oferta.

Un otro mentira cu nos a gara sr. Giel ta haci, ta unda e ta bisa cu e suma cu esaki lo bay costa, ta 7.2 miyon dolar. Pero sr. Giel aki deliberadamente ta laga e 3.7 miyon dolar afo cu ya caba AIB/SOGA a aproba den pasado pa construccion di un cathlab y un departamento di sterilisacion di sala di operacion.
Pues e suma total pa construccion di salanan di operacion ta alrededor di 11 miyon dolar.
Banda di e parti aki tambe mester bin un construccion TEMPORARIO pa por acomoda e exigencia di e seguro medico di hospital.
Manera ya ta conoci, e seguro cu HOH tin, a exigi pa trece cambionan necesario prome cu 15 di juni 2015, sino ta para e seguro. Pa por cumpli cu e exigencia aki, Bermelo a haci un oferta, pa prome cu juni 2015 adapta e salanan di operacion segun e rapport di TNO, cu lo bay costa casi 4 miyon dolar.

Sr. Giel no ta menciona tampoco cu ora cu e projecto keda cla completamente, lo deshaci di e salanan temporario aki. Esaki contrario na e oferta di Bussman cu e salanan lo keda pa semper y cu lo costa 6 miyon menos. Pues conforme loke Bermello a presenta, e dos proyectonan aki lo bay costa nos pueblo 15 miyon dollar. Ta bon pa menciona aki tambe cu Bermello ta cobra casi 1.000.000,= DOLAR pa e meerwerk aki. Ta kiko mas falta ainda, ya cu esaki ta sin cu a pone ni un bloki ainda.

Loke ta remarcabel, ta cu e architecto "profesional" Bermello NO a incorpora renobacion di salanan di operacion den e masterplan cu lo cubri 25 aña desde e fase inicial di construccion di hospital. Nos a bin compronde cu e compania frances for di un principio a mustra riba esaki, pero esnan involvi NO tabata tin oido pa esaki.

Tambe ta remarcabel cu sr. Frensel Giel ta menciona e suma di 7.2 miyon dollar, mientras ta conoci y hasta menciona door di e director medico Cilie, cu e suma di renobacion presenta door di Bermello himself na fin di januari 2015, lo ta alrededor di 15 miyon dolar. Dicon sr. Giel un biaha mas ta gaña?

Un otro mentira cu a ser treci dilanti pa sr. Giel, ta ora cu e ta declara cu tur hende ta di acuerdo. Wel, den nos brievenbus nos a ricibi documentonan cu ta bisa todo lo contrario. Ta conoci cu ora un persona ta tuma e caminda pa gaña, ta pasobra e tin algo di sconde of e ta wordo paga pa haci esaki.
Den e caso aki, cuidow cu no ta tur dos. Pasobra manera mi a bisa anteriormente, nunca sr. Giel a defende projectonan cu ser critica severamente unda AIB ta involvi. Esaki ta ponemi pensa cu aki tin placa ta lora pisa, pasobra tempo di e projecto di dump y e construccion di un hospital nobis nobis, esey SIGUR no a pasa.

NO tabata tin placa pa SKOA di alrededor di 1 miyon florin pa cubri su gastonan, NO tin placa pa nos grandinan, NO tin placa pa esnan margina den nos sociedad, NO tin placa pa nos hendenan special, pero SÍ tin placa pa Bermello y Arellano di alrededor di 5 à 6 miyon dollar (no florin).

Mi ta spera cu Parlamento para e bagamunderia aki y laga e minister y sr. Giel responsabilisa nan ponencianan y evita mas deroche di placa cu no tin.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 17, 2015

Expresionnan haci den e articulo aki no necesariamente ta refleha opinion di ArenaPoliti.co