Nos a tuma nota di e conferencia di prensa en bibo di Gabinete Eman den cual nan ta gaba e rapport preliminario di IMF riba e situacion financiero y economico di nos Pais. Nos promer reacion ta cu Gabinete Eman kier gaba cu dolor di Pueblo di Aruba, ya cu e rapport di IMF ta yena cu medida doloroso pa Pueblo.

Den e rapport aki Gabinete Eman mes ta bolbe confirma locual nan a priminti na CFT. Gabinete Eman lo bay pasa medida rigoroso pa por drecha e desaster financiero cu a wordo haci durante nan gobernacion. E rapport di IMF tambe ta bolbe confirma cu nos tin un megadebe pa cual di cada florin 80 cent mester bay pa cubri debe y no ta resta placa pa cubri gastonan necesario pa Pueblo. Gabinete Eman a splica IMF di e medidanan cu nan a tuma caba pa APFA, SVB y AZV, pero asina mes nan no ta suficiente. IMF a splica bon cla cu si Gabinete Eman no tuma mas medida e deficit lo keda crece y e debe lo keda halto. Aki ta unda cu Gabinete Eman a informa IMF cu den e presupuesto di 2015 nan lo sigi corta den beneficio y cantidad di empleado publico pa por baha gasto. Banda di esaki lo bay bin mas medida pa baha tur gasto di Gobierno relaciona cu AZV. Y mescos cu na 2010 y 2013, IMF a bolbe recomenda Gabinete Eman pa hisa belasting indirecto. Pa awor Pueblo sa cu esaki kiermeen cu Gabinete Eman mester bolbe hisa BBO.

Cu tanto medida cu mester wordo tuma ta incomprendibel con Ministernan Mike Eman y Mike de Meza por bay gaba na radio cu e rapport di IMF ta bon noticia. Ya caba Pueblo ta sufriendo cu e medidanan cu a wordo tuma. Mas medida ta significa mas dolor pa Pueblo y pesey ta un falta di respet y un bofta den cara di Pueblo pa scucha Ministernan Eman y de Meza ta gaba na radio cu e rapport di IMF ta bon noticia siendo cu e ta contene medida doloroso pa e Pueblo di Aruba.


17 februari 2015

Expresionnan haci den e articulo aki no necesariamente ta refleha opinion di ArenaPoliti.co