For di e prome mitar di aña 2014, UPP a haci preguntanan entorno posibel actonan inapropia di cierto specialistanan, laborando den e sala di operacion na HOH.
Riba nos insistencia, un paar di luna despues di e prome denuncia, AZV a bin dilanti cu en berdad tin un investigacion tabata ser haci door di un compania di Corsow.
Sinembargo, di parti di e minister Schwengle tin un silencio hermetico.

Dia 28 di september 2015 UPP a publica un articulo (J'ACCUSE PART 1), na unda a haci un denuncia publico di posibel actonan inapropia di cierto specialistanan, y atrobe a haci preguntanan, y a bisa cu a bira tempo pa tanto AZV como HOH y Minister Schwengle bin padilanti y duna cara riba e asunto aki. UPP a bisa cu si no contesta nos preguntanan, nos lo menciona nombernan di esnan involvi y lo bay haci un denuncia oficial al respecto.
Un paar di dia despues AZV a bin cu un declaracion cu a demostra cu realmente kier sconde cos pa pueblo y proteha cierto specialistanan. Den dicho declaracion a bira pa nos mas cla, cu realmente cosnan iregular a tuma lugar, pero kier purba di laga esnan culpabel "get-away"!!
Siman pasa UPP a bin cu un otro denuncia (J'ACCUSE PART 2), e biaha aki riba posibel actonan na IMSAN.
Aki tambe preguntanan a ser haci entorno esaki, pero atrobe tin un silencio hermetico.
Y awe, dia 13 di october 2015, ta net dos siman cu nos a publica y a pidi esnan involvi pa bini padilanti, sino nos mes lo divulga e nombernan.

Den nos brievenbus nos a haya documentonan cu ta ilustra actonan di dos cirugano, cu den nos concepto ta por lo menos inapropia.
Mester tene den mente kiko AZV a bisa siman pasa riba e asunto di "waarneming", y ki ora por papia di "waarneming".
Por papia di "waarneming" SOLAMENTE ora cu un di e specialistanan ta malo, cu vakantie of ta afo pa un conferencia.
Nos kier a mustra riba solamente un caso di casonan inapropia, na unda dr. Ponson ta opera dia 23-10-2012 y mesun momento dr. Daryanani ta operando, esta dia 23-10-2012.
Y Ponson ta cobra. Con esaki por ta?
Y asina aki, propablemente tin hopi mas casonan di actonan inapropia, cu segun nos informe ta core den mas di 100 mil florin den un aña so.
Y nos a bin ta compronde cu AZV a yega na un acuerdo cu dr. Ponson pa paga esaki back. Si no tin actonan inapropia a tuma lugar, dicon mester paga back?

Den nos publicacion di siman pasa, nos a mustra cu den un "gesloten beurs systeem", esun cu cobra dobbel, ta cometiendo fraude, no tin otro splicacion, y NO ta na AZV pa dicidi pa no haci denuncia.
Y si e director tuma riba su mes pa sconde cos y no haci denuncia, e tambe ta bira complice den e actonan inapropia aki.
Ta di spera cu despues di esaki, AZV, HOH y Minister bin padilanti y bisa algo al respecto, pasobra nos ta convenci cu nan tur ta na altura di esaki.
E otro caso di actonan inapropia ta esun di dr. Jaramillo cu tabata traha na IMSAN y cu recientemente a ser retira, of a ser pidi pa e mes pidi su retiro, pa IMSAN no bay denuncie, pasobra e lo tabata haci uso di e buki di receta di IMSAN pa su propio beneficio.
Probablemente sea e tabata busca e remedinan cu e mes tabata receta, pa despues bendenan na "niet verzekerden", of e tabata usa esakinan pa scirbi recetanan pa patientnan cu no tin carchi di AZV (obviamente personanan ilegal aki na Aruba), y cu e lo ta trata pafo di IMSAN.
Y si esaki ta e caso, e dokter aki ta cometiendo un otro acto penal.
Ta di con atrobe ni e director di AZV, ni e director di IMSAN, ni e minister no a entrega keho na Ministerio Publico??
Y pa completa e obra, supuestamente te hasta ela haya placa pa e bay. Pregunta na esnan involvi si esaki ta berdad??
Manera UPP a bisa caba, un polis cu a haci su mes culpabel na un acto inapropia, corectamente a ser deteni y probablemente lo bay perde su trabow, y lo wordo sentencia penalmente.
Den e caso aki, a saca potret di su detencion, a demonise enormemente, pero den e caso di e dokternan ariba menciona, ta djis mester paga back y e otro ta perde su trabow, y cu te hasta a haya placa pa e bay.
Dicon e diferencia den e trato pa actonan inapropia?

Ta di spera tambe cu otro partidonan politico, y alabes tanto gremio comercial como sindical, laga nan voz resona riba esaki, pasobra aki nos ta papia di miles di florin cu ta bay a costo di e cuido medico cu nos pueblo tin derecho riba dje.

Proximamente UPP lo bay haci un denuncia oficial tambe di e actonan aki na Ministerio Publico.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, october 13, 2015

Expresionnan haci den e articulo aki no necesariamente ta refleha opinion di ArenaPoliti.co