Algun dia atras Minister de Meza a declara na prensa cu e lo kier hiba WEB den direccion di un empresa cu tin 3 Director na mando. Pa ta mas specifico, Minister de Meza kier nombra un Director Operacional, un Director Financiero, y un Director General pa dirigi WEB.
E sistema aki ta uno cu sa keda implementa den empresanan grandi ora cu kier diversifica responsabilidad di cada Director.

Nos no tin nada contra pa bin cu un mihor structura di maneho na WEB, pasobra mirando e escandalo cu tabatin rond di hedging, un maneho structura lo por a evita cu Aruba awe ta pagando sumanan astronomico na awa y coriente.
Tumando e asunto di hedging como ehempel, ken lo bay carga responsabilidad di e parti aki? Nos tur ta de acuerdo cu no ta solamente sr. Oslin Boekhoudt ta responsabel, pero unda e Raad van Toezicht di WEB a keda? Unda e Director di Utilities N.V (doño di WEB) a keda? Unda e Raad van Toezicht di Utilities N.V a keda? Pero principalmente, unda e Minister encarga cu e cartera aki, cu ta sr. Mike de Meza, a keda? Pasobra na final di dia ta Minister de Meza ta e unico responsabel directo di e escandalo di hedging.

Si nos tuma e caso di e Director anterior di WEB como ehempel, cu a carga responsabilidad di e blunder di hedging, nos por saca afor cu su status laboral no ta conoci ainda. Y di esaki e pregunta ta bin dilanti: sr. Oslin Boekhoudt ta riba payroll di WEB ainda? Despues cu e Gobierno aki a conden’e, con por ta posibel cu ainda e ta riba payroll? Of lo ta bon pa nos puntra directamente, ta ki informacion Oslin Boekhoudt tin cu e merece un trato preferencial for di Gobierno di AVP?

Si en caso cu di berdad sr. Oslin Boekhoudt ta riba payroll di WEB ainda, cobrando un salario di Director, e ora nos lo ta papiando di paga 4 salario di Director na WEB.
Un otro gasto innecesario cu atrobe pueblo tin cu paga p’e, banda di e gasto innecesario di e hedging.
Un otro pregunta cu ta surgi den e caso aki tambe ta, cu si loke cu Minister de Meza ta bezig cun’e ta eingelijk creando vacatura pa aloca simpatisantenan di su partido AVP. Mirando cu ta obvio cu e barco berde a cuminsa sink, desesperadamente ta creando cuponan di trabou pa aloca mas campañador posibel prome cu Gobierno cambia.

Expresionnan haci den e articulo aki no necesariamente ta refleha opinion di ArenaPoliti.co