Tin biaha bo ta keda asombra di lesa tanto calumnia y insinuacionan sin base den comunicado. Esaki ta pasa hopi biaha ora bo no tin argumento mas pa defende bo propio rol y accion como representante di pueblo den un desaroyo financiero negativo. Netamente esaki te caso di lider di fraccion AVP sr. Herde cu a dicidi di papia over ignorancia. Pero si kier papia di ignorancia mester cuminsa den su propio cas prome cu wak otro.

Ki ora berdad bo ta ignorante? Wel e desaroyo financiero precario di nos pais no a yega caminda cu e ta cu arte di magia. Dimes cu no, esaki ta origina for di e promer añanan cu Gabinete Eman a tuma mando di noa pais ora cu Minister de Meza a tuma mando di finansas sigui pa sr. Yrausquin. Den e promer 2 añanan ya caba indicadornan financiero tawata mustra con iresponsabel nos pais tawata wordo maneha y e rumbo cu e ta bayendo. Awor e receta perfecto pa un desaster financiero ta consisti di algun ingrediente pa menciona algun 1) ignorancia, 2) incapacidad 3) no cumpli cubo trabou como parlamentario.

Parlamento specificamente fraccion AVP durante tur e añanan cu a traspasa tawata basta ignorante ora ta trata finansas publico di nos pais.
Parlamento no a hasi su trabou y ta pesei awendia nos ta bou supervision financiero acompaña cu yobida di medida. Tur esaki por a wordo evita si parlamentarionan di AVP a asumi nan responsabilidad. Ta obvio cu e aprobacion di tur e presupuestonan for di 2010 te cu 2015 tawata un eror grandi den historia di Aruba. Ademas e ta bisa hopi di e 13 parlamentarionan cu ciegamente a sostene cifranan cu tawata totalmente irrealistico y incompleto. E solo hecho cu na varios ocasion a cambia of surpasa e presupuestonan ta un muestra cu parlamentarionan no a cuestiona , studia y a hasi nan trabou manera debe ser.

E ignorancia ta bai asina leu y ne mesun momento bo por confirma incapacidad di parlamentarionan pa cu nan rol den e desaroyo financiero negativo di nos pais. Ta di lamenta cu fraccion AVP ta ignorante y nunca a controla gobierno sino a continua na sostene un maneho iresponsabel y deficiente sin pensa riba e consecuencianan grandi cu esaki por tin pa full un comunidad!

Expresionnan haci den e articulo aki no necesariamente ta refleha opinion di ArenaPoliti.co