Realidad amargo cu no ta ser splica pa Rene Herde 

Un di e fondonan social cu constantemente ta den boca di lider di fraccion di AVP, Rene Herde ta esun di APFA, esta e fondo di pensioen di e ambtenaarnan. Segun Rene Herde, Gabinete Eman supuestamente a logra scapa e fondo aki, cual ta un mentira flagrante y cu a ser describi caba den e ultimo comunicado di MEP.
Sinembargo nunca e ambtenaarnan mes a yega di tende for di Rene Herde cu cuanto placa nan lo bay atras na momento cu nan yega na e edad di bay cu pensioen. Pesey partido MEP ta haya su mes obliga di trece na conocemento di e ambtenaarnan (specialmente esnan hoben y semi-adulto) kico lo spera nan na momento cu nan bandona servicio di gobierno y cuminsa cobra nan pensioen. Pa haci esaki, ta sigui dos ehempel concreto.

Pensioen bao MEP y AVP
Durante 8 aña di Gabinete Oduber nunca e ambtenaarnan a biba den tormento cu aumento di edad di pensioen, nada di Franchise, nada di Middelloonregeling, nada di reduccion di e porcentahe di acumulacion di pensioen y nada di reduccion di Duurtetoeslag.
Den e tabel adhunto ta mustra ehempel di e situacion na 2009 - bao di Gabinete Oduber - di un ambtenaar cu tin un salario di 40 mil florin pa aña (Afl. 3333 florin pa luna) y cu tin 30 aña den servicio di gobierno. Na momento cu e ambtenaar aki bay cu pensioen, e ta ricibi Afl. 2222 florin pa luna na pensioen di APFA.
Den e otro tabel ta mustra ehempel di e situacion actual – bao di Gabinete Eman - di e mesun ambtenaar aki cu tin un salario di 40 mil florin pa aña (Afl. 3333 florin pa luna) y cu tin 30 aña den servicio di gobierno. Na momento cu e ambtenaar aki bay cu pensioen, e ta ricibi solamente Afl. 979 florin pa luna na pensioen di APFA. Pues e ambtenaar aki ta bay atras cu 1243 florin tur luna!


Masacre pa e pensionadonan
Aki por mira claramente cu debi cu Gabinete Eman a introduci e medidanan di Franchise,  Reduccion di e porcentahe di acumulacion di pensioen y Reduccion di e Duurtetoeslag, e ambtenaar aki ta bay atras y lo cobra Afl. 1243 MENOS na pensioen tur luna. Un reduccion astronomico cu lo bay ta un masacre pa e futuro pensionadonan di gobierno. Mester remarca si cu den e calculacion treci padilanti no a tene cuenta cu e medida di Middelloonregeling, ya cu si esaki ta e caso, e situacion lo ta aun mas penibel pa e ambtenaar aki. Alavez no mester lubida cu e mesun ambtenaar aki ta entrega caba Af. 58760 di pensioen, ya cu e tin cu traha 5 aña mas, esta te cu 65 aña, un otro medida cruel di Gabinete Eman.
Hecho ta cu e realidad amargo di un pensioen mutila no ta ser conta door di Rene Herde, kende tur dia ta papia bunita so, pero no kier splica e parti scur di tur e medidanan cruel cu su gobierno di AVP a impone riba lomba di e ambtenaarnan y futuro pensionadonan di gobierno. 

Expresionnan haci den e articulo aki no necesariamente ta refleha opinion di ArenaPoliti.co