SANTO DOMINGO – Siman pasa a tuma lugar e conferencia plenaria di COPPPAL, Conferencia Permanente de Partidos Politicos de America Latina, na Republica Dominicana.
Partido MEP ta co-fundador y ainda miembro di COPPPAL, y den cuadro di e conferencia plenaria lider di MEP sra. Evelyn Wever-Croes tabata un orador invita, pa papia riba e tema ‘El status politico de las islas/paises’.
Den su presentacion lider di MEP a duna un splicacion amplio di e historia di e islanan den Reino Hulandes, y e desaroyo desde e tempo di descolonisacion. E tempo ey Hulanda a compromete su mes cu Nacionnan Uni di yuda su ex-colonianan pa haya mas autonomia, pa nan para riba nan propio pia. Sinembargo, e desaroyo cu nos ta mira awor, ta parse net contrario, ta mustra señalnan di re-colonisacion.
Lider di MEP a enfoca riba e caso di Aruba y demas islanan den Reino Hulandes. E caso di Aruba ta diferencia cu esun di e demas islanan den e sentido cu pueblo di Aruba NO a wordo consulta na momento cu e gobierno actual a entrega nos autonomia. “Nos no por sera wowo pa e mal gobernacion cu tabata tin den ultimo 6 anjanan na Aruba, caminda nos debe nacional a wordo redobla. Nos sa cu ta nos propio gobierno, cu su maneho iresponsabel, a causa cu nos a perde nos autonomia. Pero Hulanda su papel den esaki tambe ta dudoso, pasobra Hulanda no ta tene su mes na su obligacion di den Statuut di duna garantia, y ta permiti e mal gobernacion continua. Gastonan den aparato gubernamental ta sigi mesun cos, gasto di luho y di fiesta ta continua, mientras e pueblo ta wordo afecta pa medidanan cruel. Y mientras cu e gobierno actual ta wordo azota pa escandalo tras di escandalo Hulanda ta bira cara y wak otro banda”, segun lider di MEP Evelyn Wever-Croes.
Esey ta e motibo cu partido MEP un biaha mas ta aserca COPPPAL pa sosten den encamina e proceso pa Aruba haya su autonomia bek. “Locual nos kier, ta haya bek locual nos a perde desde 1986. Na anja 1986 Aruba a haya su Status Aparte cu a trese hopi bienestar pa nos tur. Pero desde e tempo ey nos a perde hopi di nos autonomia. Varios gobierno a bin y a bai, y apesar cu no tur gobierno su maneho financiero tabata mes responsabel, nunca antes nos pais a conoce un gobierno asina iresponsabel cu awe a manda nos debe nacional mas di 80%. Maske nos ta compronde cu Hulanda mester a actua, nos ta cuestiona e forma di actuacion di Hulanda, pasobra segun Statuut Hulanda mester pone un paro na e mal gobernacion na Aruba, pero no ta hasi esaki y ta laga e pueblo Arubano sigi bira victima di e mal gobernacion. Nos kier haya nos autonomia financiero bek, y pa logra esaki nos mester di un maneho financiero saludable y responsible, y e ora nos tin tur derecho di exigi bek locual e gobierno di Mike Eman a entrega. Den pasado caba nos a demostra cu partido MEP por goberna na forma responsabel, hasta cu surplusnan financiero, y nos ta dispuesto pa hasi’e atrobe”.
E presentacion di lider di MEP Evelyn Wever-Croes a wordo hopi bon ricibi, el’a ricibi hopi reaccion positivo despues y e muestra di sosten di tur 68 pais presente tabata abrumador. COPPPAL den su reunion plenaria a duna Aruba e sosten, manera a keda publica den un resolucion, y cu esaki partido MEP ta sigi cana su caminda pa denuncia e gobierno di AVP y di Hulanda internacionalmente.