E partido MEP tin algun don cu poco organisacion por domina manera nan. Nan ta domina e capacidad di core pa duna contesta riba preguntanan cu haci nan. E pregunta cu a haci nan siman pasa por ehempel: dicon economia di Aruba a cay cu 20% bou gobierno di MEP? Y dicon ela crece cu 16 bou di gobierno di AVP....te awor? E pregunta aki no ta djis pa molestia e hendenan di MEP. E asuntonan di nos pais ta mucho serio pa haci wega. E ta un pregunta masha importante, pasobra cu e caida di 20% di nos economia durante di e ultimo periodo di 8 aña di gobernacion di MEP, a bay acompaña cu un aumento continuo di desempleo te yega 12% na 2009. Mas cu 6000 hende extra a perde nan trabou. E mes un periodo a bay acompaña pa stagnacion den inversion, den caida di turismo, den cierre di e refineria, den caida drastico di forsa di compra cu a acumula te yega 24% y un welga di 7 siman di trahadornan cu nan sindicato pa haya algo bek. E mes un caida di economia a bay cu un aumento di prijs di coriente cu 250% y deterioro di e solidez di e dos fondonan di pensioen te casi nan a bay bancarota. Pero mas cu tur, den e mes un periodo di gobernacion di MEP cu tur esaki a sosode, tambe a nenga di inverti den enseñansa y a laga e minister wanta critica pasobra e no por a inverti den enseñansa. Otro asuntonan tabata tin prioridad. Den e mes un periodo di gobernacion di MEP barionan a deteriora, centronan di ciudadnan di Aruba a bira teritorio di chollernan, criminalidad tabata halticimo y criminalnan tabata haya e mal ehempel di gobernantenan mes. E raport di WODC ta confirma e sin fin di violacionnan di ley door di ministernan den e periodo di gobernacion di MEP. Pesey ta importante pa compronde di e partido y e hendenan cu a causa esaki, ta kico nan a haci pa causa esaki cu nos pais y nos hendenan. Pasobra hamas esaki tin mag di ripiti. Ora papia di haci gobernacion MEP-proof, ta esaki nos kier men: con ta preveni cu e tipo di mal maneho aki ta bolbe sosode den nos pais.

Expresionnan haci den e articulo aki no necesariamente ta refleha opinion di ArenaPoliti.co