Den e ultimo seis aña y specialmente den e dos añanan cu a pasa, gobierno di AVP a scohe pa trece balansa den condicionnan financiero di nos pais. Mescos cu tur pais di mundo, gobiernonan di Aruba pa e ultimo 29 aña, a cubri parti di e gastonan cu fiansanan local y internacional. E motibo ta cu e gastonan di gobiernonan semper ta mas halto cu su entradanan. E motiba pa esey ta cu gobiernonan ta haci tareanan y duna servicionan cu niun otro instancia por of kier haci. Pero niun hende kier keda sin e servicionan ey tampoco. E crisis financiero di aña 2008 a demostra sinembargo bon cla cua ta e riesgonan grandi di e forma di opera servicionan publico cu fiansanan aña tras di aña. Pa limita y evita e riesgonan aki, gobierno di AVP a dicidi di hiba un maneho pa balansa presupuestonan dentro di cinco aña. Esaki ta nifica cu e gastonan regular no por ta mas halto cu e entradanan cu gobierno ta haya. E unico motibo pa fia placa lo por ta pa haci inversionnan necesario. Pa logra yega na presupuestonan balansa, mester baha e costonan di operasion den forma structural. Na mes un momento gobierno mester percura pa servicionan publico manera enseñansa, limpiesa di pais, seguridad y cuido continua. Tambe cu fondonan social manera di seguro social y fondonan di pensioen, keda funciona y paga e pensioennan. E reto aki - cu niun gobierno di Aruba a logra te ainda for di 1986 - ta uno importante y sumamente dificil. Pasobra e ta nifica baha gasto y tog percura pa servicionan essencial y responsabilidadnan di gobierno continua. E ta nifica reorganisa y sigui crece alavez.

SCOHE
Den e ultimo dos añanan gobierno di Aruba a logra baha su gastonan den forma structural asina hopi cu e deficit riba presupuesto a baha di 9.3% pa 3.7%. Pa benidero tres aña e deficit riba presupuesto lo mester sigui baha te yega 0%. Esey ta nifica cu mester sigui baha gastonan di gobierno ainda mas. Te awor aki gobierno a logra haci esaki sin afecta servicionan essencial manera servicionan di polis, aduana, enseñansa, cuido social y medico y otronan. Tambe sin pone gastonan dimas riba sector priva of comunidad. Esaki ta di aplaudi si bo wak con otro paisnan si a corta den servicionan social, cuido medico y enseñansa, manera na Hulanda mes a sososde. Gobierno di Aruba a logra baha su gasto tambe sin stroba crecemento economico y na mes un momento a logra baha e cantidad di hende cu tabata sin trabao for di 2008. Den e ultimo cinco aña mas cu 3500 hende mas a haya trabou na Aruba. E escohencianan aki ta mustra e prioridadnan di gobierno di AVP: pone Aruba crece atrobe, pero no a costo di crecemento economico, no a costo creasion di mas cupo di trabou den sector priva, no a costo di forsa di compra of di forsa di companianan den sector priva. Un di e cosnan cu ainda no a haci, ta reorganisa e aparato di gobierno, pa e funciona mas eficiente, mas servicial, mas productivo y cu menos gasto. Esaki ta e reto cu gobierno tin cu atende awor. Pasobra esey ta beneficia tur hende na Aruba.

Expresionnan haci den e articulo aki no necesariamente ta refleha opinion di ArenaPoliti.co