Fraccion di MEP a entrega mocion di desconfiansa contra Gabinete Mike Eman 

ORANJESTAD -- Den e reunion publico cu a trata e cuenta anual 2013 di pais Aruba, fraccion di MEP a pone hopi enfasis riba e iregularidadnan y violacion di leynan cometi door di ministernan di Gabinete Eman. Pa MEP e no ta promer biaha cu ta wordo constata cu AVP y su ministernan ta viola Constitucion y leynan di comptabilidad.

Riba e violacion di leynan aki parlamentarionan Evelyn Wever-Croes y Xiomara Ruiz-Maduro a dedica nan disertacion. Ademas di esaki parlamentario Dangui Oduber a enfatisa riba e derochamento di placa cu a tuma lugar bou di Gabinete Eman den anja 2013. Mientras parlamentario Ady Thijsen den su disertacion a trece e puntonan tecnico dilanti cada biaha ora e Ministernan a viola leynan. Na un manera hopi profesional y di nivel fraccion a trece nan argumentonan dilanti. Argumentonan cu ni e minister di finansas Angel Bermudez, ni ningun parlamentario di AVP por a contra aresta cu argumento. Pa fraccion di MEP Gabinete Eman no merece confiansa pasobra ya caba na e di 2 anja di gobernacion por a prueba cu nan a malgasta fondonan publico te cu awor a redobla de debe nacional di Aruba.

Aña 2013 e iregularidadnan y violacionan di Gabinete Eman tawata e druppel final. Netamente pa esaki Fraccion di MEP a trece varios puntonan di consideracion dilanti entre otro cu Parlamento ta tratando e cuentanan anual di 2013 te 18 november y cu e contenido di e cuentanan anual di 2013 ta proba di e peor maneho financiero di pais Aruba. Tambe a enfatisa cu e cuentanan anual di 2013 ta refleha e mal maneho cu a causa e redoblacion di e debe nacional di Aruba, hasi'e te 80%. Kiko esaki ta bisabo? E maneho financiero di Gabinete Mike Eman cu a wordo trata diaranson ultimo ta esun cu a causa e KB di dia 11 juli 2014 consecuentemente a hiba na e perdida di autonomia financiero di nos pais cu introduccion di CAFT dia 27 di augustus 2015. E puntonan aki tawata di hopi peso y pesei Fraccion MEP a entrega un mocion di desconfiansa contra Gabinete Mike Eman. Lamentablemente fraccion di AVP a demostra cu e tey djis pa grita "voor" y a ignora tur e violacionnan. Puntra ken cu bo kier, unda cu bo kier, si nan tin confiansa den maneho financiero di Gabinete Mike Eman y TUR lo contesta bo cu nan NO tin confiansa mas den e maneho financiero di Gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co