ORANJESTAD - Na final di e participacion di Aruba den foro mundial COP21 na Paris, Minister di Desaroyo  Teritorial, Infrastructura y Integracion, Benny Sevinger a califica e encuentro como un siman hopi importante y hopi interesante pa mundo henter. Aruba tambe a beneficia enormemente pa medio di e aliansa y tecnologianan nobo cu a conoce. “E acuerdo en berdad ta bay trece cambio den e direccion cu nos ta bayendo cu e clima y aumento di temperatura riba mundo, pero e ta mas cu djis un encuentro pa yega na un acuerdo, tambe tabatin hopi solucion innovativo cu  nos por a presencia,” asina e mandatario a expresa.

Minister Sevinger a splica cu algun ta ideanan cu ainda tin cu concretisa, manera por ehempel con un pais por tin henter su sistema di transporte publico riba vehiculonan di bateria. Pa cu esaki, e fabricantenan mas grandi di auto na mundo a presenta nan vision. A argumenta cu incentivonan for di sector publico ta esencial pa e iniciativanan aki por ta exitoso. Un ehempel di esey ta loke Aruba a haci di baha e tarifa di impuesto di importacion riba autonan electrico.

Segun e mandatario, tecnologia ta bayendo dilanti rapidamente pa cu introduccion di energia alternativa manera sistema nobo di molina di biento y tambe mata cu ta absorba e biento y solo y ta comberti esaki den energia. Sigur ta opcionnan cu Aruba como pais lo kier wak mas di cerca pa mantene su posicion di lider den e tereno.

“Den tur e foronan cu Aruba a participa, nos a wordo bon ricibi y felicita pa e esfuerzonan cu nos isla ta haciendo pa yega na e meta di 100% na 2020 y nos ta menciona manera un ehempel di con un pueblo por ta sostenibel riba termino largo y comparti e prosperidad ey cu otro nacionnan,” Minister Sevinger a bisa.

Hopi partner riba e foro mundial a acerca Aruba pa wak con por traha hunto. Nacionnan Uni cu ta organisador di e foro mundial tambe ta para tras di e vision y ta ocupa cu e creacion di Centro di Excelencia na Aruba for di unda ta bay comparti informacion riba e avancenan haci cu otro pais y nacionnan di mundo.

Na final, Minister Sevinger a indica cu “tabata un siman largo di trabou cu reunionnan cu a cuminsa di mainta te anochi, pero nos ta bay cu e satisfaccion cu a yega na un acuerdo cu mundo lo beneficia di dje pero tambe un agenda cu Aruba tambe por sigui traha riba cu partners nobo y tecnologia.”

Expresionnan haci den e articulo aki no necesariamente ta refleha opinion di ArenaPoliti.co