For di e cifranan di Banco Central cu a keda presenta siman pasa ta bira bisto cu e buraco den nos finanzas publico, e deficit, pa 2015 ta mas grandi cu locual gobierno a pemira y esaki ta debi na e falta di responsabilidad di Gabinete Eman. Nan no tin e boluntad pa tene nan mes na ningun plan, corda pa drecha e desaster cu nan mes a haci.

Deficitnan nunca antes bisto
Ya for di 2011 e Presidente di Banco Central a bin ta adverti cu nos Pais ta observando deficitnan nunca antes bisto. For di e cifranan mas reciente di Banco Central nos por wak cu e deficit tabata 325.2 na 2011, 443.3 miyon na 2012, 332.8 miyon na 2013 y 405,8 miyon na 2014. Pa 2015 falta ainda e cifranan di e ultimo kwartaal, pero ya caba na e tercer kwartaal di 2015 e deficit a yega 234.5 miyon florin. Esaki ta cifranan cu nunca antes nos Pais a yega di conoce na deficit. Durante e gobernacion di Gabinete Oduber di 2001 pa 2009 NUNCA nos a Pais a core structuralmente cu deficitnan asina grandi. Pesey ta incomprendibel con Minister Eman por papia di a hereda un disaster financiero siendo cu ta na man di su gobierno nos Pais ta conociendo e deficit monstruoso nan aki.

No ta cumpli cu ningun plan
Ainda nos ta corda cu cuanto fanfaria Gabinete Eman a bin cu e plan di baha deficit tur aña cu 75 miyon, cu e plan di Balanced Budget Rule y cu e 24 medidanan pa drecha finanzas publico. Realidad ta cu ningun dia Gabinete Eman a cumpli cu su mesun plannan. Enves di baha e deficit door di gasta menos, Gabinete Eman a bira gasta fondo publico na grandi practicando clientelismo cumprando voto pa por keda na poder. A fia placa, traha debe manera no tin un mañan. Den solamente 4 aña Gabinete Eman a redobla e debe acomula pa TUR gobierno den 23 aña di tempo y esaki sin conta tur e proyectonan PPP cu trece mas gasto y debe pa Pais Aruba. Asina aki Gabinete Eman a kibra nos Pais cu deficit y debe nunca antes bisto.

No ta cumpli cu norma di CAFT
Pa 2015 ta bisto caba cu e deficit ta hopi mas grandi cu locual ta e norma pa 2015 ancra den e Ley di supervicion financiero di CAFT. Pa 2015 e deficit lo mester tabata na 3.7% equivalente na 185 miyon florin. Pero for di e cifranan di e tercer kwartaal di Banco Central nos ta wak cu e deficit ta na 234,5 miyon caba cu ta equivalente na 4.7% cual ta hopi mas halto cu e norma di 3.7% den Ley di CAFT pa 2015.

Mester boluntad pa baha deficit
Pa baha e deficit di nos Pais, e entrada di gobierno mester por cubri su gastonan. Tanten cu e gastonan keda halto y tanten cu e entrada di gobierno keda atras, nos Pais lo keda cu deficit. Gabinete Eman a mustra Pueblo cu nan no tin e boluntad pa baha e deficit. Pesey si Pueblo kier pa e situacion drecha, Gabinete Eman simplemente mester bay su cas y na su lugar Pueblo mester pone un gobierno cu tin e boluntad pa baha deficit na un manera responsabel na bienestar di e Pueblo aki.


22 januari 2016

Expresionnan haci den e articulo aki no necesariamente ta refleha opinion di ArenaPoliti.co