Minister President constantemente ta papia di sostenilbilidad, sin tene cuenta cu loke ta necesario pa un desaroyo ta realmente sostenibel, ta e complemento di 3 factor: sociedad, economia y medio ambiente. E tres factor nan aki ta vital pa haci un pais sostenibel.
Pero lastimamente a keda demostra cu pa sr. Mike Eman e unico aspecto di sostenibilidad cu tin un importancia relevante ta e nomber, pasobra obviamente e no ta considerando Aruba su sociedad, economia, ni medio ambiente den su supuesto maneho sostenibel.

Si nos tuma e Parke di Molina di biento na Urirama como ehempel, nos por conclui firmemente cu e ta un proyecto cu no tin ningun tipo di logica su tras.
E tendencia di prijs di crudo internacionalmente ta mustra cu e lo keda abou pa un periodo basta largo ainda. Y sabiendo esaki, ainda Gobierno ta insisti cu e proyecto di molina di biento na Urirama mester bira un realidad.
Cu otro palabra, esaki ta bay ta un di dos hedging cu consecuentemente lo bolbe costa pueblo miyones di florin.

Mi por a tuma nota cu algun sostenedor di Gobierno ta argumenta mi ponencianan pa cu e tematica aki, bisando cu nos na Aruba tin e deber di yuda salba mundo. Argumento cu den mi opinion no tin valides, pasobra si e Gobierno aki no tin e capacidad di salba su mesun isla, ta con e lo por bay salba mundo?
Pa ami e ta hopi mas logico y conciente pa cuida y salba nos isla prome,
y laga esey sirbi como ehempel di sostenibilidad pa mundo henter.
Sr. Mike Eman ta bendiendo un soño berde cu el a yama 'sostenibilidad', pero convenientemente nunca a splica nos kiko ta e complementonan necesario y obligatorio pa yega na un desaroyo sostenibel.

E prijs di Mike Eman su soño berde ta costando nos pais demasiado!
Na Aruba nos ta pagando un hedging inhusto danki na e briyante idea di Ministernan Eman y de Meza. Obviamente nan no a pensa riba un maneho sostenibel ora nan a dicidi di hedge 100%. Aki nan a faya 1 di e 3 principionan di sostenibilidad; economia.
Nos pueblo ta luchando y sufriendo pa por logra paga e prijsnan excesivamente halto di awa cu coriente. Aki Mike Eman a faya e di 2 principio di sostenibilidad; sociedad.
Obligando bo pais pa hasi sacrificio pa paga tarifanan sumamente halto di servicionan basico, nunca lo tin espacio den un maneho sostenibel.

Partido AVP ta alaba nan mes bisando cu nan a drecha infrastructura di Aruba. Y si nos tira un bista rond, di berdad nos lo wak camindanan y edificionan bunita, pero na mes momento nos ta mira un comunidad yena cu pobresa y tristesa.
Si esey ta e costo cu nos tin di paga pa AVP logra su soño berde, e ora ey mi lo busca cualkier otro opcion pa scapa nos pueblo di sufrimento.

Den mi opinion, e ser humano mester tin prioridad riba cualkier reconocemento personal.
Tin un gran cantidad di persona aki na Aruba cu tur luna mester hasi e scohencia entre cumpra cuminda, of paga paga awa cu coriente. Ta e famianan aki mester ta nos prioridad principal como politico. Na momento cu nos por sigura cu no tin famianan den sufrimento y pobresa na Aruba, e momento ey nos por cuminsa discuti con nos ta bai salba mundo.
Nos tin cu salba nos mes prome pa asina nos por salba mundo, esey mester ta e orden di prioridad corecto di un Gobierno pa cu su pais.

Na Aruba nos a yega na un punto cu show y palabranan bunita no ta valido mas.
Awor nos a yega na un punto caminda nos pueblo mester solucion inmediato pa tur e problemanan social cu a cuminsa destrui nos esencia Arubano di pas y trankilidad.

Expresionnan haci den e articulo aki no necesariamente ta refleha opinion di ArenaPoliti.co