Cada ves ta bira mas bisto cu e Fraccion di AVP den Parlamento no por produci argumento sano pa asina por contra-aresta e berdad cu nos di opoicion ta trece dilanti. Sigur pa locual ta trata e finanzas publico di nos Pais nos ta ripara cu e Fraccion di AVP no ta haci un esfuerso pa por compronde e materia dificil aki y pesey ta recuri na hopi mentira y muchachada den nan afan pa purba contra-aresta e berdad financiero cu e cifranan di Banco Central y e rapportnan di Raad van Advies, CFT y Algemene Rekenkamer ta trece dilanti.

Parlamentario ‘on call’
E siman aki mes nos a tuma nota con e lider di Fraccion di AVP ta insinua cu opocicion mes no por formula argumento y mester yama e Parlamentario Hulandes Adre Bosman pa splica cu e situacion financiero di Aruba ta malo. Esta un muchachada. Tur hende pa awor sa cu sr Bosman ta den e Comicion di Tweede Kamer cu ta atende cu asunto di Reino y den e calidad ey ta duna su opinion riba locual ta pasa den e Paisnan den Reino. E tambe ta lesa y compronde locual cu e rapportnan di Banco Central, Algemene Rekenkamer, Raad van Advies y CFT ta bisa y ta adverti Gabinete Eman y e Conseho di Minister di Reino riba dje. Sr Bosman tambe ta wak cu Gabinete Eman no ta cumpli cu ningun acuerdo y ningun plan cu nan mes ta presenta. Ta informacion cu nos di opocicion largo bay ta trece dilanti, pero awor cu sr. Bosman a vocifera e mesun preocupacion na radio y den media na Aruba, Fraccion di AVP kier core tilde di ta parlamentario ‘on call’ di opocicion. Esta un ridiculez. Fraccion di AVP por a haci nan best pa presenta sikieria un argumento sano pa contra-aresta locual cu sr Bosman a trece dilanti.

Puro argumento fofo
E ta remarcabel cu den full e Fraccion di AVP no tin un hende cu conocemento di finanzas publico pa por formula un argumento sano pa contra aresta e berdad cu tur instancia ta bisa riba e situacion financiero di nos Pais. Na lugar di esaki ta bin cu puro argumento fofo. Por ehempel ta bisa cu na 2009 e situacion financiero tabata malisimo. Pero ora bo lesa e rapportnan di instancianan manera Banco Central, Fitch, Standard & Poors, IMF etc bo por constata cu na 2009 nos Pais tabata financieramente hopi mihor para y e tempo ey no tabata tin ningun discucion riba KB, supervicion financiero, curatela, CFT y welga di hamber. Tambe kier usa e argumento cu Gabinete Eman no a tuma ningun medida pa drecha e situacion financiero. Esta un mentira. Ta con nos mester yama e BAZV cu cual a hisa BBO? No ta BBO tabata e medida cu Eman lo a elimina? Ta tilda MEP tambe di laga Hulanda mete den asunto di nos Pais na 2014, pero asina mes Baba hunto cu Fraccion di AVP a vota pa CFT su supervicion financiero bira un realidad na Aruba, algo cu Minister Eman mes a boga y firma pe. Ta parce cu Baba a lubida cu 8 aña largo su lider Eman tabata subi KLM bay Hulanda pa yena nan cu oido riba e Gobierno di MEP. E ta bisto cu e argumentonan aki ta hopi fofo y te ainda nos ta warda Fraccion di AVP bin cu un argumento sano pa por contra-aresta e berdad financiero cu opocicion ta trece dilanti.


11 februari 2016

Expresionnan haci den e articulo aki no necesariamente ta refleha opinion di ArenaPoliti.co