Minister di Infrastructura, Benny Sevinger: Aruba Bank ta comparti e vision di innovacion pa Caya Grandi invertiendo den edificio y productonan nobo
ORANJESTAD –Minister di Infrastructura Benny Sevinger tabatin e honor, banda di un comerciante di trayectoria largo centro di Oranjestad, esta Sr. Benchi Pick di La Moderna, pa corta cinta durante ceremonia di apertura di e Mainstreet Express Branch di Aruba Bank. E mandatario a felicita e banco y tambe elogia e empresa local pa comparti e vision di Gabinete Mike Eman pa renobacion y innovacion den Caya Grandi.
“Nos como gobierno ta hopi contento cu un otro compania, y den e caso aki un banco local cu tin un nomber y trayectoria asina importante den nos pais, ta dicidi di inverti den caya principal y cu ideanan innovativo,” asina Minister Sevinger a expresa diahuebs atardi, momentonan despues di e apertura.
Gobierno a haci y ta haciendo su parti di infrastructura, pero ta contento di mira cu e comercio local tambe a tuma e reto di inverti den nan edificionan, drechando fachada y biniendo cu productonan innovativo, segun e mandatario. E ta combenci cu tipo di iniciativanan aki ta yuda duna caya principal un otro bida y ambiente.
“Di e manera aki nos ta traha hunto pa tin un centro di ciudad cu ta biba y cu ta digno Aruba, di un di e islanan mas bunita den Caribe. Nos ta felicita Aruba Bank y ta desea nan hopi exito,” Minister Sevinger a finalisa bisando.
Expresionnan haci den e articulo aki no necesariamente ta refleha opinion di ArenaPoliti.co