Despues di a tuma nota con Paul Croes kier hunga politica barata acusando MEP di no tin interes di nos hobennan na pecho nos ta sinti nos mes yama pa reacciona mesora y corigi Paul Croes. Segun Paul den su publicacion cu MEP no ta aporta na ideanan pa hobennan y nunca a traha na bienestar di nos hobennan. Pesey mester refresca Paul Croes su memoria, ya cu ta hustamente MEP durante  2001-2009 a sostene e proyecto FDEC, esta Fundacion Desaroyo Educativo Comunitario.  Kico e proyecto aki tabata encera? Den 6 bario na Aruba hobennan por a acudi despues di school unda nan tabata wordo educa y por a haña les di entre otro musica y arte. Asina e proyecto aki tabata contribui na formacion di nos hobennan. Lamentablemente ta e mesun Paul Croes hunto cu Otmar Oduber a torno y caba cu e proyecto aki na 2014. Na un manera cruel Paul a apoya e idea pa KITA subsidio di e proyecto aki y asina a mata e proyecto mandando tur e educadornan tata y mama di famia cas. Pa DJ Chucky si Paul a aproba 1 miyon y pa Electric Festival unda Paul ta bay balia y goza y indirectamente contribui den “VENENA” nos hobennan tambe Paul a grita “VOOR” pa aproba miyones. Pero pa un proyecto noble manera esun di FDEC a kita tur subsidio cu filosofia di AVP si ta di MEP e ta “kill it” sin importa consecuencia.  Desde e tempo ey ta primintiendo diferente proyecto cu lo remplasa esaki pero te cu awe net net nada. Hopi scuma pero poco chuculati. Mester refresca Paul su memoria tambe cu MEP a traha masha hopi riba infrastructura den Deporte . Pa duna un ehempel den bario di Noord netamente caminda Paul ta campaña tin un bunita Compleho Deportivo multi funcional Stadion Frans Figaroa incluyendo un Technical Center. Poco mas pariba MEP a laga dera e dump di AVP na Jaburibari unda cu den e subsuelo tin mas di 60 miyon florin di e fantasia  y corupcion di AVP di e hotelnan Italiano  unda te awe nos ta pagando. Esaki a bira un Parke Social unda masha hopi hoben ta hasi uso di dje. Stadion Nadi Croes y Crismo Angela na Sta Cruz, Parkenan na Pos Chikito, Veld di futbol cu yerba artificial na Yara y asina tin hopi mas proyecto cu MEP a construi pa brinda nos hobennan oportunidad. Mester recorda Paul tambe e bunita proyecto OLIMPIADA ESCOLAR  BETICO CROES unda schoolnan tabata competi contra otro uniforma por ehempel  cu uniform di Real Madrid, Barcelona etc etc . Stadion tabata full house cu mayornan durante e bunita evento aki.  Cu aprobacion di Paul esaki a wordo mata. “Kill it”. Asina nos por keda menciona un cantidad di proyectonan exitoso cu MEP a traha pa nos hobennan. Pues ta incomprendibel ora Paul kier pretende cu MEP no tin interes y no ta kere den nos hobennan solamente pa purba score y saca probecho politico. Mi ta convenci cu awor si pueblo  a catch e maña di AVP, esta priminti bay goal y acusa MEP di tur cos pa despista hende di actualidad pa nan por keda cera  deal trankil cu figuranan manera Rincon y Kiko Gomez. Den esey nan ta campeon. Terminando  mi lo mester bisa cu berdad Paul a traha duro pero pa (1) hoben, esta e hoben  Eva Maria. Esaki ta e hoben di 21 aña cu Paul a regla su permiso den 24 ora via “whatsapp” pa e por traha den e bar na Ponton.  Paul a bay corte contra e corant cu a publica esaki y a perde su caso dilanti hues unda hues a bati riba su dedenan den su forma di proceder. Pues ora Paul kier pinta MEP malo sin cu e tin rason nos lo percura pa refresca su memoria alinstante cu prueba y argumentonan real. 

Expresionnan haci den e articulo aki no necesariamente ta refleha opinion di ArenaPoliti.co