ORANJESTAD – Prome Minister Mike Eman a cualifica e ceremonia di diabierna atardi como un momento hopi special y di orguyo. Special pasobra ta honra e bida y trabou di e pioneronan di e industria mas importante di nos isla, pero tambe di orguyo den su colega Minister Otmar Oduber, kende hunto cu Aruba Tourism Authority (ATA) a sa di reconoce y traha riba e necesidad pa tal monumento bira realidad. Lider di Gabinete Mike Eman a hiba palabra na tur esnan presente, incluyendo e propio pionero y nan famianan y den su palabranan el a expresa gratitud pa reconoce y capitalisa riba e virtud di  hospitalidad y trabou duro di e Arubiano.

“Nos por duna honor y respet na e pioneronan cu a yuda pone fundeshi pa e industria mas importante di nos pais; e industria cu ta produci entrada pa mas di 80% di nos famianan tur dia; e industria cu a pone Aruba riba mapa internacional; e industria cu ta recorda nos tur dia di e virtudnan importante cu nos grandinan a pasa pa nos; pasobra nos industria turistico ta basa riba e esencia di un virtud importante cu ta inculca den e curason y alma di e Arubiano desde e prome momento di existencia di e isla aki y e comunidad cu ta biba riba e isla. E hospitalidad cu ta haci e industria turistico di Aruba asina fuerte, ta tambe ta un di e virtudnan mas grandi di e pueblo Arubano,” Minister President Mike Eman a expresa.

El a laga sa bon cla cu ta cu orguyo, cu un reconocemento profundo, cu un sinti intenso di amor y cariño cu finalmente nos ta yega na e momento pa, como pais, como un comunidad bini hunto y expresa na Sr. Cohen loke henter Aruba ta sinti pa loke el a haci y nifica pa Aruba. “E ta un momento despues cu nos a yama Sr. Cohen ayo cu awo nos ta bini bek, no den tristeza pero den felicidad, pa expresa na Sr. Cohen su famia henter con hopi nos ta stim’e, con hopi nos tin cariño p’e y con hopi nos ta aprecia e fundeshi di turismo cu el a pone pa Aruba.” Asina Prome Minister Mike Eman a bisa, pidiendo un y tur presente pa lanta y duna un aplauso fuerte na Sr. Ike Cohen.

Expresionnan haci den e articulo aki no necesariamente ta refleha opinion di ArenaPoliti.co