Papia di logro awe ta hypocresia politico  

Minister Eman no por hustifica e MEGADEBE y debi na esaki ta buscando tur manera pa desvia atencion di e daño cu ela haci na e situacion financiero di nos Pais. Pesey awe e mandatario kier papia di e reforma den APFA, edad di pensioen y AZV como logronan di su gobierno siendo cu tur hende mester sa cu den opocicion semper Minister Eman tabata esun cu a boycotia e reformanan necesario na, entre otro, e fondo di pensioen di APFA.

Instiga y tene rapport scondi
Ya for di 2005 cambionan a cuminsa wordo haci den e fondo di pensioen di ambtenaar pa asina por sigura cu e fondo por keda stabiel. E tempo ey a cuminsa cu esnan cu a drenta nobo den gobierno lo goza di un otro areglo di pensioen cu esnan cu ya tabata trahando y contribuiendo na e fondo. Pero Sr. Eman den opocicion a cuminsa bruha tera, manipula y instiga tur sindicato pa no bay di acuerdo pa haci e cambionan necesario den e areglonan existente pa por sigura e fondo di pensioen. Esaki ta e motibo cu Gabinete Oduber no por a sigi cu e reformanan necesario. Banda di esaki e fondo di APFA tambe a sufri na man di e crisis financiero mundial. Un rapport cu ta splica kiko e consecuencia di e crisis aki tabata riba e cobertura di e fondo a keda conclui, pero Minister Eman a tene e rapport aki scondi pa despues atrobe por a sali instiga y gaña cu e maneho di e gobierno di MEP a pone cu e cobertura di e fondo di APFA no ta suficiente.

Keda sin paga APFA y perhudica e ambtenaar
E gobierno di Henny Eman no tabata cumpli cu APFA manera mester ta. Pesey na 2004 Gabinete Oduber mester a hinca 271 miyon florin den e fondo plus paga boet y interes cu a hiba cu mas di 600 miyon a bay pa por a saca APFA di e desaster cu Gabinete Henny Eman a laga e fondo aden. Awe historia ta bolbe ripirti. Gabinete Mike Eman a keda sin paga APFA manera mester ta y pesey a core hisa e edad di pensioen di e ambtenaar den pura na 65 aña, corta den beneficio di e ambtenaar y pone nan bay mas atras cu e areglo proponi na 2005. Y tur esaki djies pa Gabinete Eman por paga menos na prima pa e ambtenaar y resta placa pa riba e custiya di e ambtenaar por gasta na otro cosnan cu no ta necesario.

Hypocresia politico
Pesey awe Minister Eman mester tin berguensa pa papia di logro y di falta di curashi di Gabinete Oduber, pasobra den opocicion tur tempo ela sa di instiga y boycotia e reformanan necesario na APFA. Pa yama locual ela haci como logro ta puramente hypocresia politico.

15 februari 2016

Expresionnan haci den e articulo aki no necesariamente ta refleha opinion di ArenaPoliti.co