E ta conoci cu Gabinete Eman a redobla e debe di nos Pais acumula den 23 aña di tempo den solamente un periodo di gobernacion di 4 aña. Mas y mas hende ta puntra nan mes ta na unda e suma di e MEGADEBE aki a keda inverti, ya cu nan no ta mira cu Minister Eman of un otro exponente di AVP por hustifica e MEGADEBE aki. Un cos ta sigur, cada dia ta bira mas bisto cu Minister Eman a crea e MEGADEBE aki pa drecha e economia di su amigo y sponsernan.

Menos di 1% a bay pa Pueblo
Cifra di Banco Central y rapport di CAFT, tur dos ta indica cu menos di 1% di tur e fondo na dispocicion di Gabinete Eman a bay na invercion pa Pueblo. CFT den su Cuenta Annual di 2014 riba pagina 18 mes ta comenta cu “de afgelopen jaren heeft de overheid nauwelijks geïnvesteerd.” Y tirando un bista den CFT su otro rapportnan riba Aruba ta bira bisto cu e Gabinete Eman a usa e fondonan aki pa consumo enves di invercion pa Pueblo. Y aki ta na unda e dolor di Minister Eman ta sinta ya cu e no por bisa Pueblo cu e placa cu a bay na consumo tabata pa practica clientelismo cune, na unda cu a usa fondo publico pa cumpra voto pa yega y keda na poder.

Yuda economia di amigo y sponsernan di AVP
Minister Eman a haci debe grandi riba cabes di nos Pueblo y e generacion nos dilanti, pa asina por duna hende cos, duna trabou na unda no tin vacatura, paga contract cu salario halto pa funcion cu no merece un pago asina grandi, huur edificio di famia y sponser di partido, paga suma astronomico na fee di abogado amigo di partido, paga fee halto pa huur in conseho di consultant pa asina pone e experticio di e ambtenaar un banda, biaha den grupo grandi rond di mundo, sponser team di futbol cu ta perde, paga huur y yen di otro gasto pa Rietveld y TNO, traha yen departamento nobo pa gobierno pa asina nombra campañador como coordinador, nombra director sin solicitud habri, parti tereno pa amigo y sponser na prijs barata, paga compania di marketing sumanan cuantioso pa haci propaganda pa manipula e Pueblo su mente cu informacion robes y pa cuestiona y lastra opocicion. Ta pa esaki Minister Eman a crea un MEGADEBE na nos Pais. Pa drecha e economia di un grupo selecta di amigo, famia, sponser y hasta lovers, lagando e Pueblo bay atras sin invercion pa crece nan cartera y e economia di nos Pais.

Recuri na manipulacion pa sconde e berdad
Pesey ora Minister Eman bisa cu ela traha debe pa inverti den Pueblo, e mandatario simplemente no ta papia berdad. Minister Eman a crea un MEGADEBE pa por yuda drecha e economia di su amigo y sponsernan y no por sigi recuri na manipulacion pa sconde e berdad aki. Awor bo sa na unda bo placa a bay di berdad!

15 februari 2016

Expresionnan haci den e articulo aki no necesariamente ta refleha opinion di ArenaPoliti.co