Studiantenan ta preparando un buki riba pasado, presente y futuro di arkitectura di Aruba 

ORANJESTAD - Diaranson mainta Prome Minister tabata na Rietveld Academie situa na Wilhelminastraat caminda antes tabata Brenchie's Hardware Store. Na e ocasion aki sr. Eman a reuni cu un grupo di studiante di Universidad Tecnico di Delft (TU-Delft) pa un sesion di innovacion. El a duna un presentacion den sala di e academia di arte caminda a papia di e diferente forma cu su gobierno a haci uzo di inovacion na beneficio di desaroyo y maneho sostenibel di Pais Aruba.

E arkitecto Arubiano ir. Raffy Kock a acepta peticion di Minister di Infrastructura Benny Sevinger pa guia e grupo aki durante nan temporada di trabou. Kock a organisa seis sesion cu a keda reparti den angulonan individual. A cuminsa algun dia atras cu Historia y Naturalesa, sigui pa Turismo y Infrastructura, mientras cu ultimo a haya Desaroyo y Innovacion.

Seis studiante di facultad di Arkitectura di TU Delft ta pasando varios siman riba nos isla pa siña di nos isla y su particularidadnan. Entre nan tin un studiante Arubiano, Zaira Pourier, kende ta liderando su coleganan durante nan estadia na Aruba. Proyectonan similar a tuma luga caba na Amsterdam y Barcelona, entre otro.  

Pourier a haci entrega na Premier Eman di varios buki, incluyendo un di Aruba cu ta sirbi como guia pa e grupo durante nan estudio. Despues di nan trabou riba nos isla, na september, e grupo ta saca otro buki. Segun ir. Kock, esaki lo ta un enciclopedia caminda lo tin tur informacion di loke ta pasando na Aruba riba tereno di arkitectura.

“E ta un proyecto hopi importante pasobra den e buki bo ta bay haya diferente aspecto di historia, desaroyonan di pasado, presente y di futuro,” ir. Kock a splica. E buki ta bay contribui enormemente pa e diferente studiante na Hulanda cu kier haci nan afstudeerprojekt di Aruba su arkitectura.

Pa loke ta trata e seis studiantenan cu ta na Aruba actualmente, ir. Kock ta comenta cu nan ta hopi sorprendi pasobra e realidad di nos isla ta completamente diferente di e imagen cu tin di Aruba na Hulanda. “Nan ta kere Aruba ta un isla chikito cu poco hende riba dje. Nan ta impresiona. Nan ta wak e manera un ciudad comparabel cu, por ehempel Den Haag si bo wak e poblacion.”

Expresionnan haci den e articulo aki no necesariamente ta refleha opinion di ArenaPoliti.co