Con comer Ida kiermen cu no ta bin mas hotel na Aruba? Aparentemente tin un hala di construccion di hotel den pipeline, hopi tereno ainda pa rosa y beton pa basha. Ta con gobernantenan ta contradeci nan mes tanto asina? Di berdad nos isla ta un ‘Republica di Banana’ unda hende no ta conta, nada ta wordo respeta y pueblo ta den un ‘coma induci’.

Chichi ta warda ansioso riba reunion den Parlamento. Ta hopi cos tin pa regla prome cu otro aña. Entre otro e proposicion di ‘screening test’ riba ‘ministeriabilidad’. Esey talbes lo implica cu mayoria di partido, specialmente e partidonan bieu, tin chens di no participa den e siguiente gobierno. Bon, Chichi ta haya cu di tur manera mester pasa un basora.

Ay ay ay, Chichi a bisa comer Ida cu e cuestion di habri refineria di nobo ta hole ‘pisca putri’. Comer Ida, comer no a ripara cu Minister Mike de Meza cada bes cu e bin papia na television e ta ripiti e mesun cos? Awo ta te aki 6 siman e show ta sigui.

Riba e cuestion di trabou Chichi ta tende cada rato cu no tin trabou pa e hoben. Awo ta kico ta hoben? Esnan cu no a yega edad di pension y cu tampoco por haya trabou, acaso nan no ta conta? Ta nan semper tabata e wes’i lomba di comunidad. No solamente nan tin experiencia, pero tambe famia pa cria. E palabra clave ta: diversificacion.

Chichi a lesa cu e mucha homber cu ta train cacho na television, Cesar Milan, ta bin Aruba! Ay, Chichi lo tin gana di puntr’e kico e ta pensa ora e mira tur e cachonan riba caya. No di e cachonan, pero di e doñonan sin consenshi y sin amor pa e prohimo di cuater pata.

Mira con palabra di un di e comerciantenan a bira realidad atrobe pa un otro. Despues di 51 aña Pinocchio a haya su mes obliga ta cera su portanan paso su benta a cay por completo. Chichi ta sigui pensa cu e negoshi di ‘parkeermeter’ no ta cumbini pueblo, mucho menos e comerciante.

Ta con, ta pa kico, di con tin cu trata e pueblo trahado malo? Despues cu e trahadonan a mustra nan fidelidad na doñonan di Hilton Hotel, awo kier paga nan cu malo? Aki no ta trata di ilegalnan cu ta traha scondi y ta tuma ‘kico cu ta’ bou di salario minimo pa sobrevivi. Foei! Respeta e trahado, trat’e bon segun nos leynan laboral y si por (y boso por!) trat’e miho ainda. Aki di berdad ‘Rubiano no mester come ‘Rubiano!

Ay! Porfin Chichi lo por cana atrobe riba beach sin trompica riba hende, aparato, cabuya y cuanto cos mas. Segun Chichi a compronde, e ‘beach policy’ cu minister Otmar Oduber a bisa cu lo implementa, lo trece structura y ordo den e ‘beach caos’ existente. Ban wak.

Entre e hotelnan sorpresa cu ta bay wordo construi tin un ‘Disney Resorts’ cu ta haya e tereno di ex-Freezone. Sigur Chichi su nietonan a keda contento ora nan a tende. Chichi ta haya cu tur proyecto di gobierno, cu claro ta wordo paga cu Chichi su placa, mester ta gratis pa pueblo. Si no ta pa pueblo, hopi lo a muri mal morto caba...

Chichi su comer ta mira cu bon wowo cu porfin ta cuminsa organisa cierto patrimonionan cultural di nos pueblo. Comer Ida a entrega un proyecto cultural cu e mesun meta y mas otro punto na gobierno un par di aña atras, pero lastima nunca el a haya atencion. Ma ainda e proyecto ta vigente tende; comer Ida su nomber y telefon ta skirbi riba dje. E di cu por yama ki ora cu ta.

E ‘chipmento’ di mucha pa Aruba a duna Chichi un bon idea! Di con na luga di ‘chip’ e muchanan no ta ‘chip’ e politiconan? Asina nos sa unda nan ta, unda nan ta bay, manera por ehempel ora ta bay Parlatino. Asina nan no por perde ni nada por pasa nan. Ta bon pa hinca e ‘chip’ den e ‘screening test’ como condicion pa ta ministeriabel. Ta pa nan mesun bon Chichi ta papia...

Dia 1 april tabata un dia laf. A lo menos pa Chichi. Paso Chichi tabata sa caba, anto sin bola di cristal, cu e ‘agreement’ tan anuncia cu Citgo y otronan lo no bay door. Chichi a spera poco ‘joke’ cu mas gracia...

Aruba tin un bunita waf na Barcadera. Laga nos wak awo si e ta bay funciona. No comer, no ta e maramento di barco of bahamento di container Chichi kiermen. Chichi ta papia di e placa cu ta wordo genera pero cu no semper ta ‘klop’.

‘Bay de wey’, con a para cu e duaneronan cu a keda suspendi? Chichi a tende cu a bin mas duaneronan suspendi acerca? 1+1=2 of =8?

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co