Den e articulo aki ArenaPoliti.co ta repasa diferente argumento pro y contra un reapertura di e refineria, tumando na cuenta e aspecto di un desaroyo turistico pa San Nicolas y Seroe Colorado, y tambe e opcion di otro industria.

Cupo di trabou
Un reapertura di e refineria por percura pa algun mil cupo di trabou dentro di relativamente poco tempo. Cuponan di trabou den forma di empleo directo, y pa contratista. Mientras cu por papia di miles di trabou cu un refineria, cu un (of mas) hotel mester papia di cientos. Si inclui mas di un desaroyo turistico banda di hotel, ainda ta dificil pa yega e cantidad di cupo di trabou di e refineria. Banda di e diferencia den cantidad di trabou, e salarionan di un refineria tin un average hopi mas halto cu un hotel. E refineria tambe ta percura pa diversificacion den e mercado laboral, mientras cu mas hotel ta trece ‘more of the same jobs’.
Un otro aspecto ta cu un reapertura lo trece hopi Arubiano bek na nos pais y serca nan famia, considerando cu hopi trahado mester a bandona nos isla pa por haya trabou despues di e refineria a sera.
Pa loke ta trata cupo di trabou cu otro industrianan lo por crea; te ainda no tin plannan concreto pa un diferente industria den caso di un desmantelacion riba e tereno caminda e refineria ta situa.

Un reapertura ta stroba desaroyo turistico na San Nicolas
Turistanan no ta bin Aruba pa wak un refineria. Tampoco pa wak un ghost town. Tin hopi sosten pa 1-3 hotel na San Nicolas. E escogencia pa purba establece un hotel grandi prome cu desaroya San Nicolas debidamente, ta wordo cuestiona. Un hotel ta relativamente ‘barata’ pa Gobierno realisa, considerando cu e inversion ta bin di e compania tras di e hotel. E timing pa un hotel nobo ta bon pa siguiente eleccion. Pero e beneficio pa San Nicolas di un all inclusive na Seroe Colorado den diferente aspecto ta mustra menos cu loke ta wordo insinua. Cu e turistanan lo sali for di e hotel y bay mas caminda ta hopi probabel. Segun minister Otmar Oduber, turista cu ta kedando pa 1 siman lo sali for di e hotel sikiera 2-3 dia. Pero di e dianan ey, cuanto tempo y placa nan lo pasa y gasta na San Nicolas (den su forma actual y riba termino corto y mediano), si den 25-35 minuut nan por ta den Oranjestad of Eagle?

Esey no kiermen cu un of mas hotel, cu shopping mall y mas, no ta beneficioso pa San Nicolas. Tambe tin plannan pa mas desaroyo, manera diferente museo, aspectonan cultural y di arte, y renovacion di e prome mita di Promenade. Desaroyonan cu lo mester bin cu of sin un refineria. Esaki ta un comienso pa haci San Nicolas mas atractivo pa turistanan, incluso esnan kedando den hotelnan existente.
Segun minister Otmar Oduber, menos cu 18% di turistanan cu bin Aruba ta bay San Nicolas/Seroe Colorado. Hopi di esaki lo ta un bishita pa Baby Beach. Esaki por ta un otro indicacion cu mester inverti substancialmente den San Nicolas prome, pa duna turistanan mas motibo pa bay y keda na San Nicolas y asina haci e probabilidad di exito di hotel na San Nicolas mas grandi.
E desaroyonan andando na San Nicolas ta riba un nivel relativamente abou, especialmente compara cu otro parti di nos isla, y sigur no suficiente pa e condicion cu San Nicolas ta aden. Un parti di Aruba cu tanto aña, bou di diferente gobernacion, a y ta ricibi relativamente tiki inversion duradero di Gobierno. Mientras cu Oranjestad a haya Linear Park, renobacion di Caya Betico Croes, tram, Cocolishi etc., San Nicolas a keda atras cu inversionnan relativamente abou.

Tur esaki ta crea duda den si e impacto di e plannan turistico pa San Nicolas ta bale la pena pa desmantela e refineria y perde e beneficionan di e refineria. E idea cu por ehecuta e plannan turistico aki (cu exepcion di Bahia Principe), hasta cu un refineria den operacion, no ta zona imposibel. Hasta ta wordo menciona cu tin e posibilidad di boutique hotels (chikito), cu e refineria den operacion, pero ArenaPoliti.co no tin informacion concreto riba esey.
Y mescos cu nos no por sa sigur con largo e refineria lo keda habri si realisa un reapertura, tampoco tin garantia cu un hotel na San Nicolas lo ta un exito.
Realidad ta keda cu, si e meta ta pa crea un desaroyo turistico grandi na San Nicolas, un refineria lo stroba e desaroyo. 

Tambe mester remarca cu, banda di hopi sosten pa un desaroyo turistico na San Nicolas, tambe tin hopi cu ta cuestiona si no ta miho pa desaroya San Nicolas den un otro forma (sin un refineria), diversificando nos economia, creando cuponan di trabou duradero y di miho pago cu den sector turistico, y muda mas instancia gubernamental pa pariba di brug pa tene y trece mas trahado pariba. Pa loke ta trata e puntonan di bista di partidonan politico pa e desaroyo di San Nicolas, por lesa un resumen cortico na cabamento di e articulo aki.

E refineria no a yuda San Nicolas
Entre otro minister Otmar Oduber a expresa cu, durante e ultimo 30 aña, e refineria financieramente a percura pa trahadonan y a contribui na caha di Gobierno, pero no na un desaroyo pa San Nicolas. Pero dicon no? Pa gran parti, ta e diferente gabinetenan mes no a inverti suficiente den San Nicolas. Naturalmente no ta keda na un gobierno so pa inverti, pero un gobierno tin un rol crucial den crea un desaroyo economico y haci un sitio mas faborabel pa atrae inversionistanan. Manera menciona caba, si compara e inversion di Gobierno den Oranjestad cu San Nicolas, ta mustra cu Gobierno a inverti hopi mas den Oranjestad y relativamente tiki den San Nicolas. Por ehempel, un Back to School Bazaar mane den Caya Betico Croes te ainda no ta posibel na San Nicolas.

Cu of sin refineria, cualkier Gobierno mester inverti mas den San Nicolas. Si bin un reapertura, lo por considera pa laga Gobierno aloca un parti substancial di loke e refineria ta contribui na caha di Gobierno (directamente y indirectamente) pa inverti den San Nicolas, y cuminsa planea mas adelanta den ki direccion e desaroyonan mester bay riba termino largo..

Mas diversificacion
Un reapertura lo diversifica nos economia, considerando cu actualmente e unico pilar economico ta turismo. Pero mayoria hende lo ta di acuerdo cu falta mas diversificacion economico, hasta si bin un reapertura di e refineria. P’esey ta importante pa considera si un reapertura ta stroba otro desaroyonan (miho) pa Aruba.

Si e refineria keda, Aruba ta perde un oportunidad di crea otro industria riba e tereno na unda e refineria ta situa. Un tereno cu ta hopi mas grandi cu hopi di nos ta kere. Lo tuma tempo pa desmantela y limpia/decontamina e tereno, y no tin plannan concreto ainda pa un otro industria (mas clean) eynan.

Pa loke ta trata e tereno, prome minister Mike Eman a menciona cu, contrario na e tempo cu e refineria a wordo construi, e refineria por opera na mesun nivel riba un tereno mas chikito. Esaki ta trece e oportunidad pa usa parti di e tereno pa otro industria mas limpi, hasta cu un reapertura di e refineria, pero no na e mesun nivel cu si por usa henter e tereno.

Salud y medio ambiente
E aspecto di salud mester haya mas atencion cu e ta hayando actualmente. Mientras cu e discusion tocante un reapertura ta uno nacional, hopi di esnan cu no ta biba serca di e refineria no sa con e por afecta e calidad di aire. Especialmente ora biento cambia di direccion. Nunca a haci un investigacion profundo riba e problematica aki. Un otro asunto ta si e refineria a afecta e 'grondwater' na San Nicolas, y ki efectonan esey por tin. Y a pesar cu Gabinete Mike Eman a papia hopi di green, Aruba keto bay falta leynan pa proteha medio ambiente. Cu of sin reapertura, it's about time cu un investigacion profundo wordo haci riba posibel efectonan negativo di polucion den e area, y en particularmente su efecto riba salud di e habitantenan y trahadonan.

Si bin un reapertura, tin e posibilidad pa haci e refineria menos peligroso pa salud y medio ambiente. Gobierno por negocia/exigi pa e refineria cumpli cu cierto normanan cu lo garantisa menos emision di CO2. Algun posibilidad cu a wordo menciona ta di laga e refineria opera riba gas, y haci uso di filternan cu ta reduci e polucion.

E preguntanan crucial ta cuanto diferencia e posibilidadnan pa haci e refineria mas 'environmentally friendly' lo haci, y si gobierno ta considera un refineria (hopi) mas clean como un exigencia serio. Tin biaha, en particularmente for di oposicion den Parlamento, por scucha expresionnan cu ta zona comosifuera cu kier habri e refineria cueste loke cueste. Tambe por scucha e palabra ‘clean’ wordo menciona hopi, pero te ainda falta informacion concreto en conneccion cu salud di esnan cu ta biba serca di e refineria, y esnan cu lo traha den e refineria. Na final ta keda na Gobierno pa negocia/exigi cumplimento pa loke ta trata normanan pa cu salud y medio ambiente.

Green
Pa loke ta trata e vision green, e.o. ministernan Eman y Oduber ambos a expresa cu un reapertura ta contradictorio na e vision green cu Gabinete Mike Eman tin añas ta promove. Hasta si e refineria opera den un forma mas clean, produccion di productonan petrolero ta keda contradictorio na e vision green.

Segun prome minister Mike Eman “nos tin un situacion completamente otro cu na 2009 of 2013. Aruba ta hayando un nomber internacionalmente como un isla duradero. Un reputacion y nomber cu por wordo daña si sin mas nos scoge pa reapurtura di e refineria. Esaki tambe tin un contexto internacional.”
Preguntanan cu ta surgi ta; cuanto balor Aruba tin cu duna e reputacion green, compara cu e bienestar economico, situacion financiero, y cuponan di trabou? E proceso di haci Aruba mas green mester pasa ‘by any means necessary’? E refineria ta keda un industria mucho ‘sushi’, hasta cu exigencianan stricto pa loke ta trata medio ambiente? E oportunidad pa mas Arubiano traha na Aruba, y un miho situacion financiero pa pais Aruba, ta bal e efectonan negativo di emision di CO2? Esaki ta preguntanan cu mester wordo considera.

Pa esnan cu kier un Aruba 100% green mas pronto cu ta posibel, y e reputacion y nomber mundialmente, tin argumentonan contra un reapertura. Di otro banda tin e consideracion pa un otro balansa entre e bienestar economico y con lihe Aruba mester ta ‘100% green’.

Venezuela
CITGO, e compania cu tin interes den habri e refineria, ta un compania Americano (Houston) cu, via di un subsidiario, tin como doño e compania di estado Petróleos de Venezuela, S.A. (PDVSA). Mientras cu e coneccion cu Venezuela tin su beneficionan pa loke ta trata e crudo Venezolano y posicion strategico di Aruba, di otro banda e situacion politico na Venezuela por crea duda den e stabilidad y durabilidad di un refineria di CITGO na Aruba.

Na 2014 CITGO tawata na benta pa Venezuela por yega na fondonan necesario. E benta a wordo para na januari 2015, y a opta pa otro forma pa genera fondo. Asina mes, e benta cancela no ta duna e sentimento di siguransa. Si CITGO habri e refineria, y den futuro sercano CITGO wordo bendi, kico lo pasa cu e refineria na Aruba? No por specula mucho, y por yega na areglonan pa limita cierto riesgo, pero un bon 'due diligence' ta hopi importante y e riesgo aki tambe mester wordo considera.

Intencion di AVP
Miembronan di partido AVP ta tuma tur credito cu awo tin un posibel cumprado pa e refineria. Minister Mike de Meza a bishita Houston na tres ocasion e aña aki pa papia cu CITGO. Straño ta cu, mientras cu di un banda ta bisa cu activamente a haci tur esfuerso pa haya un cumprado, awo cu tin un cumprado cu kier firma un MoU Gobierno tin un dilema y tin diferente motibo pa no bin cu un reapertura. Motibonan cu tawata conoci y existente caba durante e tempo cu a busca un cumprado.

Miembronan di AVP tambe ta duna mixed signals riba e tematica pa basta tempo caba. A bisa cu kier habri e refineria, pero niun hende kier e refineria. A bisa cu San Nicolas merece un otro desaroyo. A bisa cu e refineria ta mucho bieu. Mas recien minister de Meza a bisa cu “e refineria ta den estado razonabel, hopi trabao a wordo haci durante di añanan riba e refineria. E ta den un “mothball condition”, e ta mustrando bon. Nos a haci un “site visit” no mucho tempo patras y e ta mustra razonabel”.

Ora a mustra cu un desmantelacion a of lo cuminsa, presion di fraccionnan den oposicion MEP y PDR, y tambe ciudadanonan, sea individualmente of organisa manera PARA, a percura pa un presion palpabel riba AVP y mas envolvimento di Pueblo den e discusion.

A firma un MoU pa un hotel Bahia Principe, mientras cu a sigui busca un cumprado pa e refineria, pero awo ta bisa cu un refineria no ta compatibel cu un hotel.

Minister Otmar Oduber ta na fabor di un desmantelacion, mientras cu prome minister Eman ta den un dilema, y hunto cu ministernan de Meza y Sevinger a bay Hulanda pa discuti e tema cu gobierno Hulandes. Sr. Eman a laga sa cu e decision final lo wordo tuma cu envolvimento di Parlamento.

Pa complica e asunto mas, tin un deadline cu gobierno mes a acorda cu Valero, y un deadline cu fraccion AVP a aproba den forma di un mocion den Parlamento, cu ta haci cu un decision mester wordo tuma pronto.

Ideanan di partidonan politico pa San Nicolas
PDR ta pro un reapertura di e refineria, y tambe a papia di "destina fondo structural pa desaroya un economia comercial y duradero na San Nicolas".

MEP tambe ta pro un reapertura, y ta wak esaki como un alternativa pa e medidanan cu a y probablemente lo wordo tuma. Parlamentario Glenbert Croes a bay Venezuela pa papia cu ehecutivonan di PDVSA na diferente ocasion.
MEP tambe a papia e.o. di otro industria limpi, y “concentra actividadnan comercial den e parti mas pabao di Caya Grandi [San Nicolas] pa crea un ambiente sano, caminda famianan kier bishita, keiro y haci compra, y separa e area aki di e area di e barnan, mientras ta busca un solucion duradero pa e situacion aki.”

UPP ta na fabor di un combinacion di desaroyo turistico cu algun boutique hotels, otro industria limpi, y muda e centro di gobernacion pa pariba di brug. Recientemente UPP tambe a expresa cu “mirando cu gobierno no a haci nada pa ningun otro desaroyo economico positivo pa San Nicolas y cu e situacion cu gobierno a maniobra e pais aki aden pa loke ta su debenan [...] ta esencial pa laga e oportunidad di un re-apertura como un posibilidad”.

PPA a papia di un reapertura, high-tech industry, ship building, economia di conocemento, pero tambe di un desaroyo turistico estilo “Caribbean Town” cu similaridadnan na loke Gobierno di AVP ta haciendo, cu e.o. un Carnival Museum, Caribbean Music Festival, y un art-souvenir industry.

RED ta na fabor di un reapertura den cua ta crea un training school internacional pa tur loke tin di haber cu refineria, caminda “studiantenan di tur parti di mundo lo bin pa siña kico ta come y bebe den un refineria. Na mesun momento e curriculum lo ta habri tambe pa energia alternativa”. RED tambe tin e idea pa haci San Nicolas e ‘Amsterdam di Caribe’ por medio di un desaroyo den prostitucion (red light district) y desaroyo cu legalisacion di cannabis (marijuana).

E plan principal di AVP ta(wata?) mustra di ta un desaroyo turistico den cua ta haci San Nicolas e segundo capitial turistico di Aruba, cu un enfoke riba aspectonan cultural. Banda di esey tambe tin e.o. e incentivo fiscal pa negoshinan establece na San Nicolas. Riba e punto di un reapertura di e refineria, te ainda AVP ta indecisivo.


Kico abo ta considera e miho opcion den e asunto aki? Laga sa den e seccion di comments.
Pa lesa comunicadonan di diferente politico/partido riba e topicio aki, por haci un search di 'refineria' riba e website aki.

Expresionnan haci den e articulo aki no necesariamente ta refleha opinion di ArenaPoliti.co