Diamars e siman aki tabata tin un reunion publico den Parlamento cu a resulta den un reunion sumamente tristo atrobe. Miembronan di partido MEP a bolbe comporta asina baho, cu ofensanan personal, cu acusacionnnan y lastramento di nomber di hende cu no ta ni den parlamento of politica, cu un falta di respet patur regla y tur hende. E reunion ya ta wordo considera un di e reunionnan mas sushi den e ultimo ananan.
Na comienso di e reunion diaranson mainta, Rene Herdé  a duna e siguiente declaracion. E meta di esakia tabata pa bolbe hala atencion di tur miembro di parlamento pa cambia nan comportacion. En especial e miembronan di e partido MEP cu a perde tur respet pa tur hende y pa ley. Akibou ta sigui e texto di su declaracion.

Sr. Presidente,
Cu Bo permiso mi kier haci un declaracion riba e comportacion den e sala di Parlamento den e reunion di ayera.
E comportacion cu ofensanan y acusacionnan totalmente innecesario, cu no tin nada di haci cu e reunion, ta inacceptabel. Nos a wak y tende hopi cos den e parlamento aki. Loke a sosode ayera sinembargo simpelmente tabata dimas. Kisas hende ta cuminsa kere cu ta asina Parlamento mester funciona. Pero esey no ta corecto. E comportacion di ayera y di mucho hopi biaha prome, no tin nada di haci cu politica of cu e forma cu parlamento tin cu funciona. E no tin nada di haci cu con nos ta tuma desicion den Parlamento aki. Nos por tin diferencia di opinion y nos por kier expresa esaki cu pasion y conviccion. Pero e expresionnan baho y vil. E acusacionnan totalmente irrelevante y indiscreto, personal y sushi, cu nos a tende miembronan di partido MEP expresa ayera atrobe, ta inacceptabel. Esun cu e ta kere cu e ta acceptabel, no merece di ta miembro di Parlamento aki.

Pa e motibo cu e ta inacceptabel e mester stop! Nunca e comportacion aki tabata acceptabel. Mi ta sigur cu mester a stop e hopi prome caba. Pero loke a sosode ayera a bay mucho leu. Kico mas lo por bisa y haci despues di ayera. Con mas leu por bay den sushedad y ofensanan. Ta basta!  Si no, nos no merece di ta miembro di Parlamento di Aruba.

Ya cu no tin niun sancion pa obliga nos pa cambia, nos mes mester saca e conclusion cu e comportacion inacceptabel aki mester stop. Nos no tin niun otro sancion of forma di obliga niun di e 21 miembronan pa cambia nan comportacion. Pesey no ta keda ami nada otro cu urgi Presidente di Parlamento pa aplica e Reglamento di Orden di Parlamento manaera e ta scirbi y pa tur miembro y tur fraccion di Parlamento. Pesey no ta keda ami tampoco niun otro instrumento pa purba stop e comportacion aki, cu cambia mi forma di anda cu e miembronan di Parlamento cu comporta nan mes den e forma desformal aki, den of pafor di Parlamento. Loke a sosode no ta djis viola e reglanan scirbi y normanan no-scirbi di e parlamento aki. E comportacion di algun miembro di partido MEP cu nos a wak ayera atrobe, ta un simple falta di respet pa nos mes, pa parlamento y pa e pueblo cu a pone nos aki. Esaki no ta loke pueblo a pone nos haci. Esaki no ta loke Pueblo ta spera di nos.

Mi ta spera cu e comportacion di ayera y e apelacion aki di mi, cambia e forma cu e Parlamento aki ta funciona.

Expresionnan haci den e articulo aki no necesariamente ta refleha opinion di ArenaPoliti.co