Parlamento a trata e cuentanan anual di 2014, a base di e rapport di Algemene Rekenkamer. Lider di MEP Evelyn Wever-Croes a duna un splicacion di e ley. 

"Anja 2014 tabata e peor anja den historia di finansas di nos pais, e tabata e anja di KB, di e welga di hamber di Mike Eman, di Ensure, di CFT, di retiro di Juan David Yrausquin, e anja den cual Mike Eman a aumenta nos MEGADEBE cu 448 miyon florin, 15 mas di loke Parlamento a aproba! 

ALGEMENE REKENKAMER
Ami ta basa mi mes riba e conseho di Algemene Rekenkamer, ARA. ARA ta enfatisa cu sostenebilidad financiero cu ta un preocupacion continuo. ARA ta urgi Parlamentarionan pa pone e ministernan responsabilisa nan mes pa gastonan hasi cu ta surpasa presupuesto. ARA ta urgi Parlamento tambe pa no hinca e rapport den lachi, sino pa Parlamento pone orden den cas. Manera e director di ARA a bisa, si nos no pone orden den cas, otro lo bin y pon'e pa nos.

15 MIYON FLORIN GASTA SIN AUTORISACION
ARA ta remarca cu gobierno a surpasa e presupuesto cu 15 miyon florin, y ta considera esakinan "ONRECHTMATIGE UITGAVEN", pues gastonan sin cu tabata autorisa pa Parlamento. Ademas, segun ARA Gobierno no a duna un splicacion debido di esakinan. A base di esaki nos no por aproba e cuentanan annual, y libra e ministernan di e actonan aki cu ta no autorisa.

CUENTA ANUAL 2014
Fraccion di AVP no tabata mucho interesa den e contenido di e cuenta annual, nan tabata satisfecho cu e simple hecho cu tin cuenta annual. Nos di Fraccion di MEP tambe ta contento cu tin cuenta anual awor si, pero nos no ta satisfecho cu esey so. Nos ta hopi preocupa cu e contenido di e cuenta anual, cu ta mustra cu e deficit ta 15 miyon MAS di loke Parlamento a autorisa, y nos MEGADEBE a aumenta cu 448 miyon!

Tanto bal e parlamentarionan di AVP bati riba nan pecho cu gobierno di AVP a percura pa e cuentanan anual yega Parlamento, siendo cu e gobierno ta AVP ta e peor gobierno cu a maneha nos finansas, e gobierno di AVP a percura pa e MEGA DEBE di mas di 80%, gobierno di AVP a percura pa deficitnan te na 400 miyon florin, gobierno di AVP a haya KB y CFT, y asina nos por sigi.

Cuentanan anual ta instrumento pa control, no instrumento pa abusa y pa sconde "onrechtmatige uitgaven", y pa e motibo aki nos no por aproba e ley di cuenta anual. Lamentablemente e parlamentarionan di AVP a scohe pa no cumpli cu nan tarea como parlamentario, manera ARA a indica, pero ya desde oranan di trempan tabata cla pa vota VOOR pa e ley aki" lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co