Di berdad bo no sa ki ora bo por kere e hendenan di oposicion. Apenas algun siman pasa ainda oposicion tabata cita IMF pa desacredita gobierno di Aruba. Diabierna pasa cu gobierno di Aruba a invita expertonan di IMF pa tene un seminario riba e Conseho Fiscal cu gobierno ta bay crea, oposicion y nan satelitenan a purba desacredita IMF mes bisando ta ken IMF ta pa tuma luga di CFT di Hulanda. Obviamente oposicion no por dicidi pa caba si nan ta na fabor di Aruba of no. Pasobra aki no ta trata di tuma luga di CFT. Aki ta trata di gobierno di e pais autonomo Aruba, ta scohe pa laga IMF, e institucion financiero cu ta evalua tur pais serio na mundo, pa haci un trabou importante pa nos pais. E no ta un escohencia entre IMF of CFT. E ta trata di loke ta miho pa Aruba y cu ta cuadra cu su posicion autonomo den Reino Hulandes y e stabilidad financiero di nos pais den futuro.


PARA PA ARUBA
Den ultimo lunanan nos a wak un oposicion cu no a para pa Aruba ora di defende e autonomia financiero di nos pais, pero a bati man ora Hulanda a impone su desicion pa laga CFT evalua e presupuesto di Aruba. Ora e raport di CFT a sali na september oposicion a fiesta cu e raport, pero nan no por a haya loke nan tabata spera den e raport.  Nan a spera desaster. Loke a sali ta confirma loke gobierno a bisa semper! Awor cu e presupuesto supletorio a wordo trata cu tur e consehonan di CFT pa 2014, lo a spera cu oposicion lo a vota na fabor. Pero nada straño: oposicion a vota contra. Contra di e raport cu nan a bati man pe apenas algun siman prome. Ora parlamento a trata e ley pa sigura e pensioen di 6000 trahado y 5000 pensionado, bo lo a spera cu MEP lo a para banda di pueblo trahado: nan a vota contra. Ora parlamento a trata e ley pa sigura  cu tur hende na Aruba, rico y menos rico, di tur skina di nos pais, keda haya e cuido medico cu AZV ta sigura, MEP a vota contra. Awor cu gobierno di AVP ta haci cambionan grandi den gobierno pa sigura finansa publico sano pa futuro, MEP ta vota contra. Hasta cu e presencia di IMF cu algun siman na kier a desacredita gobierno di AVP cun'e. Awe e mes un IMF no ta bon. Esta un berguensa. Ta ki dia nan ta duna pueblo motibo pa confia nan?  

Expresionnan haci den e articulo aki no necesariamente ta refleha opinion di ArenaPoliti.co