Cobra loke tur hende mester a paga caba ta miho cu mas belasting nobo!

"E forma cu Minister di Finansa y Organisacion di Gobierno a scohe pa mehora entrada di gobierno a corto plazo ta uno responsabel, pero no sin riesgo. E ta sigui e conseho di IMF y CFT pa aumenta entrada di gobierno pa asina reduci e deficit riba presupuesto mas lihe. Pero e ta usa otro instrumento pa logra esey. E ta un bon escojencia. E ta hopi responsabel, pasobra ta purba evita e consecuencianan cu e instrumentonan di IMF y CFT lo tabata tin. Esta cu e ta purba evita stagnacion di crecemento economico. Pero e minister mester sigura cu e aparato di belasting ta logra recohe e placa cu tin riba caya." Rene Herde' ta reacciona asina riba e anuncio di minister di finansa den prensa cu e no ta bay introduci niun belasting nobo e aña aki pa haya mas placa den caha pa cubri e deficit riba presupuesto 2015.

META TA KEDA BALANCED BUDGET 2018
Den su declaracion na prensa e minister ta bisa tambe cu e ta logra e metanan cu a fiha den e "presupuesto-di-mas-aña" cu a traha aña pasa y cu ta cubri e periodo te 2017. Den e periodo aki e deficit riba presupuesto mester yega cero. Segun IMF y CFT e plan aki lo hasta hiba na un surplus chikito na 2018. Rene Herde': "Si minister haci esey e ta keda den e cuadro financiero cu a wordo aproba na fin di 2013 y cu e cuadro financiero cu majoria den parlamento a pone pa gobierno traha aden. Nos a bisa cu nos ta tene gobierno na e cuadro aki. Cualkier cambio di maneho of meta, mester keda dentro di e cuadro aki. Nos ta contento pa tende cu gobierno ta keda dentro di e cuadro di e acuerdo di 'Balanced Budget' y ta logra haci esaki sin introduci mas forma pa aumenta entrada di gobierno. Minister ta scohe pa cobra e placa cu pa ley nos e ciudadanonan ya mester a paga caba. Nada nobo. Solamente e ta bay recohe loke tin riba caya."

OPOSICION
Segun Rene Herde, awor e ta compronde ainda mas e declaracion di e lider di oposicion sra Evelyn Wever Croes pa pidi hende pa no paga belasting. Rene Herde': "E lider di MEP lo a prefera pa gobierno tuma medida manera MEP semper ta haci y lo a haci den e situacion aki. No solamente pasobra ta asina so MEP a haci semper. Pero mas ainda pa nan haya un motibo pa bisa cu gobierno ta tuma "medida" y usa esey como excusa pa organisa mas intrankilidad den comunidad. E unico moda pa e lider di MEP stroba gobierno pa haya e placa cu tin riba caya, ta door di bisa hende pa no paga belasting. E ora gobierno lo haya menos placa cu mester. Esey lo por forsa gobierno pa haci otro cosnan pa tog haya mas placa. E mente "machiavellico" di e lider di MEP ta sigui busca forma pa stroba Aruba bay dilanti enbez di yuda unda cu e lo por. Pasobra ta trata di nos pais. E pais di nos tur. Ken no lo kier pa e pais aki y tur su hendenan bay bon?" Asina Rene Herde a splica, aparentemente sperando combio de di mente y curason serca miembronan di oposicion.                                                                                                                                  

Expresionnan haci den e articulo aki no necesariamente ta refleha opinion di ArenaPoliti.co