Haci politica ta algo serio y principalmente goberna un pais y controla esaki ta tareanan cu mester ser tuma cu madurez y seriedad, paso aki bo ta trata cu futuro y principalmente progreso y prosperidad di un pais. 
Por a tuma nota cu un biaha un parlamentario den e caso aki sr. Marlon Sneek un biaha mas ta actua den forma infantil. Un parlamentario cu pueblo ta paga su salario pa e defende pueblo y haci su tarea cu ta controla gobierno. Pero tiki tiki pueblo ta ripara ta ki clase di representante nan tin. 
Pueblo ta bibando actualmente den hopi incertidumbre y miedo. Un ola di criminalidad ta asotando nos pais cu grandi te chikito tin miedo di sali di nan cas. Turistanan ta ser atraca diariamente y e parlamentario aki ta busca cosnan infantil pa trata na tapa e problemanan serio cu nos comunidad ta biba aden diariamente. 
Lo ta na su lugar pa el a hiba e mesa aki dilanti su colega Minister di Husticia Sr. Arthur Dowers y haci’e algun pregunta cu pa pueblo ta hopi importante pa sa:

• Pakico su persona ta papia di high season di criminalidad, mientras cu a propaganda cu lo tin tur plan pa baha criminalidad? Pueblo kier sa ki ta e plan di minister pa contene y baha esaki awo!
  
  
• Mirando cu ya a yega di bin cu un mocion di desconfiansa contra Minister su persona, e biaha aki e lo ta na su lugar ya cu criminalidad ta for di control?
  
  
• Ki ta e motibo cu nos Minister a laga kita e radarnan cu tabata controla nos costanan? Tin plan pa laga instala e radarnan bek?
  
  
• Ki ta e motibo pakico no ta percura pa helicopter por ta activo pa cuida nos isla? Lo bin cu helicopter un biaha mas pa yuda cuerpo policial combati criminalidad?
  
  
• Pakico Warda nos Costa no ta activo mas mane prome cu 2009? Lo reactiva esaki bek?
  
  
• Ki ta e plannan di Minister Dowers pa contene criminalidad y violencia cu tambe pronto lo conoce un high season bou nos hobennan?
  
  

Preguntanan cu lo ta mas alcaso pa por trece trankilidad den pueblo. Paso e pueblo aki ta biba den panico, nos comerciantenan ta blanco di atraco y nan famia ta biba den incertidumbre, casnan di famia ta biba den alerta paso e anti socialnan aki no ta importa nada mas pues ni cu bo ta jong of bieu. Aki fo nos kier mira accion di gobernantenan y tambe di parlamentarionan principalmente esnan cu ta sostene gobierno cu nos kier mira nan ta cuestiona y pone ordo riba nos gobernantenan pa nan tuma nan trabao cu mas seriedad y respet pa pueblo, paso na final di dia ta cada cent di e pueblo aki ta paga boso salario y a yega ora di duna nos respet.

Expresionnan haci den e articulo aki no necesariamente ta refleha opinion di ArenaPoliti.co