ORANJESTAD – Durante su recien biahe di trabou pa Merca, Prome Minister Mike Eman a participa den e US Caribbean Central America Energy Summit lidera pa Vice President Mericano, Joe Biden. Na final di e evento, por conclui cu Aruba cu ta hunga un papel importante den e region pa loke ta e tema di energia y cu Gobierno Mericano ta reconoce y elogia esaki. Premier Eman a bisa cu Aruba ‘ta sumamente contento cu e continuidad di interes di Merca pa e tema di energia y con nan ta co-relacion’e cu desaroyo social economico di paisnan Caribense.’ E tema ta uno cu Aruba tin algun aña caba pidiendo atencion p’e.

Nos Prome Minister ta indica con institutonan mundial manera Nacionnan Uni ta brasa y sostene nos vision. Merca y Vice President Biden ta esnan mas reciente pa sostene e islanan Caribense pa haci e conversion di energia convencional pa energia renobabel. ‘Un momento di orguyo atrobe ora cu Aruba tabata e prome pais cu Biden a menciona den su discurso di introduccion. El a elogia e progreso cu nos isla ta haciendo den e area aki,’ asina Premier Eman a relata. 

Consehero di e Vice President Mericano, Sr. Amos Hochstein tambe a elogia Aruba durante e reunion cu nos mandatario tabatin cune. En particular, ta resalta e hecho con Aruba ta avansando riba e ampliacion di produccion di energia renobabel y cu durante ultimo añanan a pone enfasis pa comparti e conocemento aki cu otro islanan.

Aruba a haci esey pa medio di oportunidad manera e Green Conference cu aña pasa tabatin e concepto di un un “Learning Event” y tambe durante e conferencia di PPP cu a organisa hunto Nacionnan Uni y Gobierno Hulandes. E hecho cu Nacionnan Uni a scoge Aruba pa establece e Centro di Excelencia riba tereno di sostenibilidad ta prueba di esey.

‘Pa nos como isla chikito cu algun aña pasa a pone un soño nos dilanti, manera Vice President Biden a bisa, no ta facil paso e meta di transforma algo ya existente politicamente ta complica,’ Premier Eman a splica. ‘Bo tin cu presenta un vision cu ta cambia formanan trdicional di haci cos y naturalmente semper tin efecto di resistencia.”

Pa e prome mandatario Arubiano ta importante cu a pasa den e proceso aki hunto cu e companianan di utilidad, cu Aruba a haya contribucion tambe di Carbon War Room, Rocky Mountain Institute y ARINA, como tambe diferente otro instancia internacional cu ta sostene Gobierno di Aruba pa yega na 100% di energia sostenibel.

Expresionnan haci den e articulo aki no necesariamente ta refleha opinion di ArenaPoliti.co