Minister de Meza despues di Cumbre di Energia na Washington. 

ORANJESTAD – Siman pasa a tuma luga na Washington D.C. e “U.S.-Caribbean and Central American Energy Summit”, den cual a participa Prome Minister Mike Eman y Minister di Energia Mike de Meza. Esaki riba invitacion di Vice Presidente di Merca Joe Biden.

Minister di Asuntonan Economico, Energia y encarga cu e asuntonan di refineria tabata presente den e encuentro aki hunto cu hefenan di Estado di paisnan den e region menciona y unda cu “a discuti e retonan riba tereno di energia,” Minister de Meza a expresa na final di e cumbre.

Durante e cumbre a haci un analisis di e status di cada pais pa loke ta uzo di energia alternativa.  “Den e parti aki Aruba a resalta masha hopi mes, unda cu den e diferente discursonan, incluyendo esun di Vice Presidente di Merca sr. Joe Biden, a menciona e trabounan cu Aruba ta haciendo. Varios pais tabata interesa den e maneho di Gobierno di Aruba y e direccion cu nos ta bayendo,” Minister de Meza a señala. De Meza a splica cu Prome Minister Eman a duna un splicacion amplio di loke Aruba ta haciendo riba tereno di energia alternativo y a wordo aserca door di representante di varios pais, pidiendo pa ayudo of asistencia riba e tereno aki. “Pues e tabata sumamente interesante.”

Presente tabata tambe ehecutivonan di companianan grandi riba tereno di energia general y alternativo cu a hasta yega di bishita Aruba.Ta evaluando pa hunto haci algun test riba e isla, cual por ta un recurso adicional barata y stabil pa uzo di coriente. Asina tabatin diferente otro compania cu e delegacion di Aruba a combersa cu nan expertonan den e ramo aki y cu ta interesa pa traha hunto cu Aruba riba desaroyo di sistemanan nobo di energia pa proteccion di medio ambiente.

Loke cu a hala atencion di Minister de Meza ta e parti di discurso di Vice Presidente Joe Biden, unda cu el a bisa cu un di e obhetivonan grandi cu mundo mester tin ta pa no ta dependiente di otro paisnan. Cada pais mester tin su forma di genera energia y traha awa potabel den forma independiente. Por coopera cu otro pero no por depende di otro pais pa esaki.

E cumbre cu a trece hunto representantenan di Gobiernonan di Caribe y Centro America, banconan di desaroyo, sector priva y otro partnernan internacional, a analisa e cooperacion regional riba tereno di energia, pero tambe pa brinda apoyo na un integracion di energia mas limpi y promove coordinacion di donacionnan.

Expresionnan haci den e articulo aki no necesariamente ta refleha opinion di ArenaPoliti.co