“Desaroyando e sector di energia renobabel ta trece potencial cu ne. Teniendo cuenta cu e fuentenan natural di Aruba, un pilar creciente den desaroyo di e sector di energia renobabel, ta ofrece un plausibel curso riba termino largo pa diversificacion economico”.

Aruba ta bayendo todo por todo pa logra di ta completamente berde na 2020. Esaki sin duda a hala atencion di IMF cu a mustra riba e desaroyo positivo di Aruba riba e tereno aki. Na 2009, prome cu Gabinete Mike Eman I a tuma gobernacion over di pais Aruba, e partido a organisa un ‘Feria Cientifico’ na unda a mustra e interes grandi cu tabata reina riba e tereno aki. Gabinete Mike Eman I a cuminsa cu e Conferencia cu mientrastanto a bira mundialmente conoci “Green Aruba” na unda Vice President Mericano anterior Al Gore tabata e prome orador principal. Mientrastanto Green Aruba a wordo organisa pa di 5 biaha caba y cada bes decisionnan ta wordo tuma pa trece Aruba un poco mas cerca di logra su meta na 2020. Green Aruba hunto cu Wubbo Ockels (dfm) a bin cu e proyecto ‘Green’s Cool’ pa scolnan secundario. Un tremendo iniciativa. E ‘drive’ cu Aruba ta bayendo pa loke ta energia renobabel a capta atencion di Sir Richard Branson, fundador di Carbon War Room. Na 2013 Carbon War Room hunto cu TNO ta firma un acuerdo di cooperacion cu gobierno pa loke ta e transicion di energia renobabel. E acuerdo firma ta defini con hunto nan ta sirbi e interesnan di Gobierno di Aruba den obtene desaroyo sostenibel riba Aruba.

E meta di e plan di cooperacion ta pa desaroya un strategia nacional solido pa promove crecemento economico, husticia social y consenshi ambiental, no solamente na Aruba, pero tambe pa sirbi como modelo pa otro paisnan pa haci e transicion di combustibel fossiel y logra ‘smart growth’. Un transicion exitoso na Aruba lo sirbi como modelo poderoso pa otro nacionnan isleño y lo fortifica e posicion economico di Aruba den e region.

Panelnan Solar riba e lugar di parkeo na aeropuerto ta un otro proyecto riba tereno di energia renobabel. Esaki a wordo haci pa medio di un proyecto PPP (Public Private Partnership). E solar panelnan aki ta genera 3.3. megawatt cu ta representa coriente pa 1500 cas pa aña. Na Aruba tin caba un parke di Molina di Biento y pronto ta cuminsa cu construccion di un di dos parke pa asina mas cas na Aruba por haci uzo di energia di e biento constante cu ta supla na Aruba. Varios cas na Aruba ta haciendo uzo caba di panelnan solar riba nan dak. Tambe scolnan ta hayando panelnan solar. Energia berde ta masha contagioso y mas y mas por mira con hobennan ta interesa nan mes pa e materia aki y ta contribui na ne.

Luna pasa Prome Minister di Aruba Mike Eman tabata invitado na e cumbre  ‘Caribbean Energy Security Summit’ y eynan a keda resalta den forma elecocuente door di Vice Presidente Mericano Joe Biden cu Aruba ta riba e bon caminda pa loke ta sostenibilidad.

Vice Presidente Biden a menciona Aruba den su discurso den forma positivo y a presenta Mike Eman como e ehempel di Caribe. Por conclui cu presencia di Aruba na e cumbre tabata exitoso ya cu wowo di mundo tabata dirigi riba e top aki y por a scucha con Aruba ta moviendo den e bon direccion.  Gobierno Mericano, articula den forma elocuente door di VP Biden indicando cu Aruba ta e pais lider den Caribe riba e tereno di sostenibilidad, Congreso y Senado a brinda nan apoyo na e forma con Aruba ta haciendo su esfuersonan pa logra ta un pais sostenibel. Eman ta haya e apoyo di e pais mas poderoso na mundo un forsa adicional cu Aruba ta riba e bon direccion. E avenidanan cu nan ta habri pa Aruba logra e reto poni su dilanti pa 2020, ta algo cu ta hayando sosten di paisnan y institutonan manera Carbon War Room, Rocky Mountain Institute, TNO y oficina di Presidente y Vice Presidente di Merca. Aruba ta riba e bon caminda. Aruba ta trahando duro pa logra e Green Gateway y tambe ta inclui den e desaroyo di energia renobabel, un prosperidad duradero pa un y tur.

Ta obvio cu IMF tambe a nota e desaroyo positivo aki y ta mencion’e den su rapport over Aruba y ta indica cu esaki ta un plausibel pilar di diversificacion.

Expresionnan haci den e articulo aki no necesariamente ta refleha opinion di ArenaPoliti.co