Manera nos a bisa biaha pasa, e desempleo ta trece problemanan social y awe nos lo papia di un solucion pa e desempleo.

Un par di añanan atras, a crea un departamento di registro pa empleo, bou nomber di Departamento di Progreso Laboral (DPL). E departamento aki ta percura pa entre otro, mantene un record di desempleo, inscribi registrado, contacta negoshi pa posibel vacatura, traha manpower planning etc. Na principio e meta di e departamento aki no tabata malo, pero si e ta funciona optimal ta un pregunta cu hopi hende ta haci. Pueblo no ta haya sa nunca kico ta e cifranan real di e desempleo of cuanto e porcentahe di desempleo ta, tampoco pa cua funcion tin mas desempleo.

Nos di PDR sa cu ta poco cuidadano ta bay inscribi na e departamento aki pasobra como sea, no tin trabou. Pero nos ta haci un yamada na nos yiunan di tera pa no permiti gobierno bisa cu e tiki trabounan cu a resta, ta rekeri trahado di exterior. Nos mes por hacie cu un sonrisa riba cara pa asina nos carga y saca e pais padilanti.

Pakico e situacion t’asina? Simplemente pasobra:
1) Forma di belasting pa e negoshinan chikito y mediano na Aruba no ta mucho na bentaha di e negoshinan. E peso financiero ta demasiado pisa.
2) A priminti tambe cu lo bin cu un forma y sistema pa crea trabou y ainda no a cumpli cu ne.

Tin persona ta pensa cu apenas un (1) asiento den parlamento PDR kier poder. Pero no ta poder PDR kier sino cambio. Cambio den transparencia, trece informacion cla y kiko ta pasa en realidad na Aruba.

PDR su plan ta simpel. Nos ta keda kere den metanan simpel pa e situacion cu Aruba ta aden awo, no por bin cu plan compleho.

P’esey PDR lo cuminsa cu:
1) Un sistema di belasting reduci pa negoshi chikito y mediano y asina kita poco peso financier manera a wordo menciona
2) Cu un belasting reduce por stimula y crea oportunidad pa trabou
3) E departamento cu mester yuda negoshi chikito y mediano mester bira mas activo y duna mas guia riba su tereno, pasobra e departamento exixtente aki cu tin actualmente no ta yudando niun negociante y tampoco ta guia nan.
4) Of, mester inicia un departamento cu si por guia negoshi actual of nobo

Expresionnan haci den e articulo aki no necesariamente ta refleha opinion di ArenaPoliti.co